SHKODRA SPORT

Një vit kalendarik perfekt dhe pa asnjë “njollë”. Napoli i Antonio Contes e mbylli vitin 2025 (në shtëpi) me një rekord historik: pas fitores 2-1 ndaj Juventusit, “të kaltrit” përfunduan vitin pa asnjë humbje në stadiumin “Maradona”, qoftë në kampionat apo në kupë.

Kanë mbetur katër (ose pesë, varet nëse Napoli arrin në finalen e Superkupës Italiane) ndeshje deri në fund të vitit kalendarik: një ndeshje jashtë fushe e Ligës së Kampionëve kundër Benfikës, udhëtime në Udine dhe Kremona, dhe dy ndeshjet e Superkupës që do të luhen në Riad.

Numra rekord – Humbja e fundit në shtëpi daton saktësisht një vit më parë (8 dhjetor 2024, kundër Lazios). Që atëherë, Napoli e ka transformuar stadiumin e tij në një fortesë të pathyeshme: 13 fitore dhe 4 barazime në Serie A në vitin 2025. Një statistikë e ngjashme nuk ishte regjistruar në plot 38 vjet, që nga viti legjendar 1987.

Kupa e Botës 2026, ndër shumë zhvillime të tjera të reja, mund të ketë vendosur një rekord: do të jetë edicioni më i shtrenjtë në histori. Shtypi britanik, po ashtu edhe shtypi francez, po raporton se biletat janë tashmë në shitje dhe me çmime të ekzagjeruara: sipas “The Sun”, biletat për edicionin e organizuar nga SHBA-të, Kanadaja dhe Meksika kushtojnë mbi 1,000 euro, më të larta se ato që janë parë tashmë për Kupën e Botës në Katar.

Tifozët do të detyrohen të paguajnë dyfishin e çmimit krahasuar me Kupën e Botës 2022; megjithatë, FIFA ka njoftuar se do të mbajë një kuotë biletash me çmim fiks në dispozicion të shoqatave të tifozëve të lidhura me federatat kombëtare.

“Ne jemi të përkushtuar për të siguruar akses të barabartë në ndeshjet tona për tifozët tanë aktualë dhe të ardhshëm”, deklaroi Federata Ndërkombëtare e Futbollit (FIFA), duke njoftuar se më shumë se dy milionë bileta ishin shitur para shortit. Afati i ardhshëm i blerjes së biletave është planifikuar për 11 dhjetor.

Legjenda e Liverpoolit, Jamie Carragher, nuk ka kursyer kritikat ndaj yllit të skuadrës, Mo Salah, pas barazimit 3-3 të Liverpoolit me Leeds United.

Sulmuesi egjiptian kishte kritikuar hapur klubin dhe trajnerin Arne Slot në zonën e përzier, duke thënë se ishte “hedhur nën autobus” dhe se “dikush donte të më bënte fajtorin kryesor”.

Carragher e konsideroi këtë sjellje të Salah si një turp, duke sugjeruar se reagimi i tij ishte i planifikuar me agjentin për të maksimizuar presionin mbi klubin.

“Mendoj se ishte një turp me atë që bëri. Ai e zgjodhi këtë moment pas një rezultati të keq për Liverpoolin për të bërë presion ndaj trajnerit dhe klubit”, deklaroi Carragher.

Ai e akuzoi më tej 33-vjeçarin për egoizëm, duke kujtuar se para ardhjes në Liverpool, Salah ishte konsideruar si një dështim te Chelsea dhe nuk kishte fituar trofe të mëdha me Egjiptin.

Carragher theksoi se pavarësisht talentit të jashtëzakonshëm dhe 250 golave të shënuar për Liverpoolin, një yll nuk mund të funksionojë pa mbështetjen e shokëve të skuadrës, trajnerit dhe tifozëve.

“Gjithmonë është ‘unë, unë, unë’ me të. Ai duhet të kuptojë se suksesi në futboll nuk varet vetëm nga një individ”, nënvizoi Carragher.

Salah ka kontratë me Liverpoolin deri në vitin 2027 dhe së shpejti do t’i bashkohet kombëtares së Egjiptit për Kupën e Kombeve të Afrikës. Liverpooli do të përballet me Interin në San Siro në ndeshjen e radhës të Ligës së Kampionëve, ku Salah nuk u ftua. /Telegrafi/

Trajneri i Real Madrid, Xabi Alonso, po ndodhet nën presion të madh për të ruajtur vendin e tij pas një humbjeje të dëmshme ndaj Celta Vigo të dielën mbrëma. Sipas mediave spanjolle, klubi tashmë ka filluar të hartojë një listë të kandidatëve alternativë në rast se Alonso largohet.

E ardhmja e Alonos pritet të vendoset gjatë ndeshjes së Ligës së Kampionëve ndaj Manchester City në “Santiago Bernabeu” të mërkurën, një duel ky që konsiderohet vendimtar.

Pak njerëz duket se janë të gatshëm të garantojnë vazhdimësinë e tij pas kësaj sfide kundër skuadrës së Pep Guardiola. Duket se kandidati kryesor për ta marrë drejtimin afatshkurtër të Real Madrid është Alvaro Arbeloa, trajneri i Real Madrid Castilla. Arbeloa ka bërë karrierë në ekipet e të rinjve të Los Blancos me rezultate të mira dhe është shumë i vlerësuar nga presidenti Florentino Perez. Mediat spanjolle e përmendin atë si një nga opsionet kryesore.

Të tjerë emra të përmendur janë Jurgen Klopp, ish-trajneri i Liverpoolit, dhe Zinedine Zidane, të cilët gëzojnë admirimin e klubit, por që duket se nuk janë alternativë reale për momentin.

Sipas AS, aktualisht askush te Real Madrid nuk planifikon të kontaktojë Zidane për një mandat të tretë te Bernabeu. Ish-ylli francez është i fokusuar te marrja e drejtimit të Kombëtares së Francës pas Botërorit 2026 dhe pas largimit të Didier Deschamps.

Ndërkohë, Arbeloa konsiderohet opsioni më i mundshëm për momentin, pasi nënshkrimi i Klopp apo Zidane duket i vështirë. Trajneri gjerman, i shumë vlerësuar te Real Madrid, ka në teori tërhequr dorë nga drejtimi aktiv dhe është i kënaqur me rolin e tij si Chief of Global Football Development te Red Bull.

Në këtë situatë, presioni mbi Alonson është maksimal, dhe ndeshja kundër Manchester City pritet të jetë kyçe për të ardhmen e tij te Real Madrid./telesport/