SHKODRA SPORT

Në Federatën Shqiptare të Volejbollit është hedhur shorti për Kampionatet e meshkujve dhe femrave për të rritur si dhe janë përcaktuar datat për fillimin e sezonit të ri. Tek meshkujt Kampionati është përcaktuar të nisë me 15 tetor. Skuadra e Vllaznisë, si zakonisht vitet e fundit edhe kësaj here do të jetë një nga ekipet pretendente për fitimin e trofeve.

Kuqeblutë do ta nisin sezonin e ri menjëherë me një sfidë të vështirë. Shkodranët do të udhëtojnë drejt Tiranës për tu përballur me Studentin vendas , ekipin Nënkampion të vendit. Java e dytë për Vllazninë do të zhvillohet në Shkoder nga ku do të presin bardheblutë e Tiranës. Më pas, në javën e tretë volejbollistët kuqeblu kanë një tjetër sfidë të vështirë teksa do të luajnë në transfertë ndaj Teutës, skuadra Kampione në fuqi. Në javën e katërt Vllaznia pret Elbasanin në pallatin e sportit “Qazim Dërvishi” ndërsa java e fundit e fazës së parë do të jetë në Korçë ndaj Skënderbeut vendas . Ndryshe nga vitet e tjera kësaj here marrin pjesë vetëm 6 ekipe duke qenë se Dinamo e Flamurtari janë tërhequr për mungesë fondesh. Sërish në ndryshim me sezonet e fundit Kampionati zhvillohet me 4 faza nga të cilat dy të parat do të luhen brenda 20011-ës dhe faza e tretë dhe e katërt gjatë vitit të ardhshëm. Pas katër fazave, 4 skuadrat që do të renditen të parat në klasifikim do të luftojnë me njëra-tjetrën për titullin kampion në zonën “Play Off”. Në këtë mënyrë këtë sezon nuk do të ketë më “Top Volej Liga”. Kështu ekipi që do shpallet Kampion nuk zhvillon më shumë se 26 ndeshje në këtë sezon. Vllaznia për meshkuj kërkon të jetë një nga pretendentet për trofe ashtu siç ka ndodhur dy vitet e fundit ku kuqeblutë kanë rivalizuar denjësisht. Pavarësisht dy largimeve të Endri Juknit e Renato Kolës drejt Teutës, shkodranët kanë akoma mundësi për të qenë mes më të mirëve të volejbollit. Ndërsa për të rinjtë akoma nuk është hedhur shorti dhe nuk është përcaktuar as data e nisjes së sezonit të ri të volejbollit.

Vllaznia rikthen skuadrën e të rriturave në volejboll për femra. Shkodranet sezonin e ardhshëm do të luajnë në Kampionatin Kombëtar për të rritura. Kjo skuadër i ka munguar prej vitesh Shkodrës dhe shpesh herë për dikë ka qenë edhe shqetësuese. Mungesa e skuadrës së femrave të volejbollit për dashamirësit e sportit ka qënë e papranueshme.

Ky ekip ka një periudhë të gjatë prej afro 20 vitesh që mungon dhe tashmë do të rikthehet sërish. Që para tre vitesh ishte trajnerja Sadije Goga ajo që krijoi një ekip me vajza të një moshe të vogël. Që atëherë, menjëherë mori pjesë në Kampionatin e të rejave. Fillimisht vetem mori pjese ne kampionat, vitin e dyte arriti te renditet ne vendin e trete dhe pas tre vitesh arriti te shpallet kampione e Shqiperise. Ndërkohë që pas këtij momenti, menjëherë lindi pyetja nëse ky ekip do të vijojë të garojë me të rejat apo do të merrej vendimi që të gjithë e dëshironin, pjesëmarrja në Kampionatin e të rriturave. Tashme vjen edhe konfirmimi zyrtar. Pas diskutimeve në “Sport Klub Vllaznia” dhe me Federatën Shqiptare të Volejbollit, është gjetur gjuha e përbashkët dhe të gjithë kanë rene dakord. Patjetër që do të jetë një mision i vështirë. Volejbollistet kanë një moshë të re, nuk kanë eksperiencën e duhur, por nga ana tjetër kanë besim të fortë në vetvete, gëzojnë talent dhe ç’është më e rëndësishmja kanë vullnet dhe dëshirën e madhe për të arritur sukses. Premtimet apo objektivat që në Kampionatin e parë ku shkodranet do të marrin pjesë natyrisht nuk do të jenë të mëdha. E rëndësishme është pjesëmarrja, fitimi i eksperiencës dhe maturimi i vajzave të reja shkodrane. Këto do të vlejnë për të ardhmen dhe ndoshta jo shumë larg në kohë, nuk duhet të çuditemi nëse Vllazninë do ta kemi ndër skuadrat e cila do të rivalizojë denjësisht për fitimin e trofeve per ti kthyer Shkodrës lavdinë e dikurshme që padyshim e meriton.

Nga lojërat me dorë, Kampionati i volejbollit për femra do të jetë i pari që do të fillojë për sezonin e ri 2011-2012.

Shorti për këtë vit është hedhur në Federatën Shqiptare të Volejbollit nga ku ekipet janë njohur me kundershtarët për sezonin e ri. Kampionati i Volejbollit për femra do të fillojë me 24 shtator nga ku do te luaj edhe takimin e parë. Pjesë e Kategorisë së të rriturave këtë vit do të jetë edhe Vllaznia. Skuadra shkodrane rikthehet pas 20 viteve me të rriturat falë punës këmbëngulëse të trajneres Sadije Goga e seriozitetit të vajzave me një moshë relativisht të re të cilat gradualisht arritën që nga pjesëmarrja me të rejat të kalojnë në Kategorinë e parë duke realizuar një dëshirë që pritet prej shumë kohësh në Shkodër. Skuadra shkodrane do ta fillojë sezonin në pallatin e sportit “Qaim Dërvishi”. Në javën e parë vajzat e volejbollit do të presin ekipin e Teutës me 24 shtator ndërkohë që pas një jave sërish do të luajnë brenda kësaj here me Korabin. Duke qenë se dy takimet e para zhvillohen në Shkodër, Vllaznia do të kërkojë dy fitoret e para për ta nisur mbarë Kampionatin. Natyrisht që nuk do të jetë shumë e lehtë për të arritur rezultate pozitive sepse vajzat e reja, pavarësisht dëshirës dhe përkushtimit në seancat stërvitore, nuk e kanë eksperiencën e duhur për tu përballur me të rriturat. Megjithatë kanë në objektiv një përfaqësim dinjitoz dhe do të provojnë të gjejnë fitoren. Këtë sezon me të rriturat përveç Vllaznisë është rikthyer edhe Divjaka ndërsa ditët e fundit është tërhequr skuadra e Lushnjes për mungesë fondesh. Në këtë mënyrë në kampionat do të marrin pjesë 9 ekipe të cilat fillimisht do të zhvillojnë dy fazat dhe më pas do të përcaktohet nëse do të ketë edhe një fazë të tretë apo do të luhet menjëherë për titullin kampion në zonën “Play Off”.

Skuadra e Vllaznisë në volejboll për meshkuj i është drejtuar plazhit të Velipojës për të zhvilluar fazën përgaditore. Pas pushimeve të verës, volejbollistët e Vllaznisë janë përgaditur për të qënë të gatshëm për sezonin e ri 2011-2012. Shkodranët kanë qëndruar në Velipojë deri ne fund të muajit gusht, pra në një periudhë 10 ditore.

Gjatë këtyre 10 ditëve trajneri Kalaja ka synuar që volejbollistët që ai drejton të arrijnë një formë optimale para nisjes së sezonit të ri që do të fillojë me 15 tetor. Është zgjedhur pikërisht Velipoja sepse është afër me qytetin e Shkodrës, vetëm 35 kilometër largësi, ndërkohë që gjithashtu ka klimë të pastër dhe ndihmon për një shëndet të mirë. Kuqeblutë e volejbollit me 31 gusht janë rikthyer sërish në Shkodër për të vijuar përgaditjet. Me seancat stervitore intensive që po zhvillohen trajneri Kalaja kërkon të ketë edhe kësaj here një ekip pretendent serioz për fitimin e titullit kampion, pavarësisht se nga shkodranët në merkaton e verës u larguan dy volejbollistë Endri Jukni e Renato Kola të cilët firmosën me Teutën e Durrësit. Këto largime sipas trajnerit të Vllaznisë nuk janë shumë problematike sepse do të zëvendësohen me elementë cilësor nga ekipi i të rinjve që sezonin e fundit u shpall Nënkampion Kombetër. Dy vitet e fundit Vllaznia është listuar ndër skuadrat kryesore për fitimin e trofeve, por kësaj here duhet pritur nisja e kampionatit për të parë se çfarë do të na ofrojnë volejbollistët shkodran këtë sezon.