Interesi i Al Hilal për drejtorin sportiv të Interit, Piero Auzilio nuk është më thjesht një thashethem, por konkret. “Corriere dello Sport” raporton se klubi saudit, i udhëhequr nga Simone Inzagi prej tre muajsh, ka paraqitur një ofertë prej 3 milionë eurosh në sezon, afërsisht tre herë më e lartë se paga e tij aktuale me mundësinë e sjelljes së asistentit të tij Dario Baccin në Riad.
Kjo ofertë e rëndësishme rrjedh nga dëshira e trajnerit për të rikrijuar një ekip kryesor që çoi në sezone shumë të suksesshme te Interi dhe kanale të konsoliduara transferimesh në Europë, thelbësore për tërheqjen e lojtarëve më të mirë në Arabinë Saudite.
Për Auzilion, kjo është një njohje ndërkombëtare: arritja në dy finale të Ligës së Kampioneve në tre vitet e fundit dëshmon për vlerën e tij, ashtu si edhe aftësia e tij për ta mbajtur Interin konkurrues pavarësisht kufizimeve financiare, në sinergji me Bepe Marottën. Drejtori sportiv, i cili iu bashkua zikaltërve në vitin 1998 si sekretar i akademisë së të rinjve, ka kaluar nëpër katër pronësi të ndryshme për t’u bërë një figurë qendrore në menaxhim.
Lidhjet e tij me Interin mbeten shumë të forta dhe kontrata e tij është e vlefshme deri në vitin 2027. Fokusi i tij aktual është të vazhdojë udhëtimin e tij me Interin, por në fund të afatit kalimtar, ai do të takohet me klubin për të diskutuar perspektivat dhe objektivat e ardhshme. Nëse lidhja mbetet e paprekur, Auzilio do të vazhdojë punën e tij në Milano. Përndryshe, një transferim te Al Hilal nuk mund të përjashtohet plotësisht.
