PERSONAZHE

Ka marrë fund zyrtarisht telenovela e Rocco Vatës. Shumë ishte folur për këtë temë në kohët e fundit teksa kishte hipoteza nga më të ndryshmet për fatin e tij. Në fillim u mendua se Roko do të linte pezull ftesën e Irlandës dhe nuk do ta pranonte atë, pasi kishte refuzuar ftesën e Shqipërisë U-21 sepse sipas tij, meritonte shumë më tepër sesa moshat e kuqezinjëve.

Në ditën e sotme, emri i Rocco Vatës u shpall në listën e Irlandës A për ndeshjet e marsit. Trajneri i Irlandës është pyetur nga gazetarët nëse ndikoi ftesa e Shqipërisë dhe interesimi për të që ta merrnin në këtë moment, por sigurisht që trajneri i irlandezëve mohoi gjithçka duke thënë se nuk ishte kjo arsyeja, por talenti i tij. “Jo, nuk ndikoi interesimi i Shqipërisë për të, por potenciali i tij. Duam ta marrim dhe ta shohim njëherë në stërvitje se çfarë është i aftë të bëj dhe që të na ofrojë në tavolinë, te Ëatfordi ka treguar se mund të vendosi edhe një ndeshje i vetëm”, tha trajneri i irlandezëve.

Një situatë aspak e bukur kjo edhe për babain e Rocco Vatës, Rudi Vatën, që ka luajtur me fanellën e Shqipërisë dhe është përkrahur dhe duartrokitur nga tifozët shqiptarë, por djalin e tij vendosi që t’ia dërgojë Irlandës për të dhënë kontribut. Faqja e njohur në Facebook kushtuar talenteve shqiptarë, Albanian Talents, ka arritur të marrë një reagim dhe prononcim të Rudi Vatës sa i përket kësaj situate. Si gjithmonë, Rudi Vata që deri dje fajësonte Shqipërinë dhe stafin e FSHF se nuk ishte interesuar për djalin e tij, tani shprehet se ftesa që i bëri FSHF nuk ishte serioze, por ishte sa për të larë gojën.

“Ky vendim erdhi pasi ata që paguhen për të parë lojtarët me vlera dhe që mund të japin shumë për Shqipërinë, nuk kanë treguar interes për Rocco Vatën dhe as nuk e kanë kontaktuar më herët kur ai mudn të luante për çdo grupmoshë të Shqipërisë. U kujtuan tani për t’i dërguar ftesë me U-21 kur Irlanda A e kishte ftuar, e bën sa për të larë gojën.

Roko Vata nuk do ta gjejë kurrë te Irlanda dashurinë që do të gjente te tifozët shqiptarë që nuk lënë stadium pa shkuar për të mbështetur lojtarët tanë, si edhe në klubet ku luajnë. Duhet të mos tregohemi naiv, ftesa nga U-21 nuk ishte serioze, ishte një thjesht një email i dërguar”, tha Rudi Vata. Kështu faji për Rudi Vatën mbetet sërish te Shqipëria që këtë herë sipas tij nisi një ftesë sa për të larë gojën, por të gjitha këto nuk kanë rëndësi përpara faktit, djali i Rudi Vatës do të luajë për Irlandën dhe jo për Shqipërinë.

Futbollisti me origjinë nga Shkodra Rocco Vata është ftuar nga ekipi i parë i Irlandës. Talenti shqiptar që luan me Uotford, do të jetë në dispozicion për sfidat e marsit.

Lajmin e ka bërë të ditur vetë federata e Irlandës. Kujtojmë se Vata ishte ftuar gjithashtu nga Shqipëria U-21.

19-vjeçari ka luajtur edhe për moshat e Irlandës më parë. Paraqitjet e tij kanë bërë që të jetë pjesë e ndeshjeve vendimtare në fazën “play-off” të Ligës së Kombeve. Me 20 dhe 23 mars, Irlanda sfidon Bullgarinë.

Nga Endri ÇINARI

E kemi thënë shpesh se futbollistët shkodranë shkëlqejnë kudo ku aktivizohen dhe një prej tyre është edhe Aleksandër Trumçi. Mbrojtësi i djathtë po mahnit në Maqedoninë e Veriut, ku tashmë aktivizohet me Shkëndijën e Tetovës. E cila është aventura e parë për 24-vjeçarin jashtë Shqipërie. Performancat e Trumçit kanë qenë me të vërtetë bindëse për sezonin 2024-25 në elitën e futbollit maqedon.

Dhe kjo u konfirmua edhe në duelin e fundit që Shkëndija fitoi në shifrat 1-0 ndaj Pelisterit, ku gjithçka u vendos nga një gol i Ibraimit. Por pavarësisht se nuk shënoi, Trumçi ishte një nga më të mirët në fushë, madje duke merituar edhe vendin në formacionin e javës së 23-të në Maqedoninë e Veriut. Një vlerësim për performancën e shkodranit, që është një nga pikat e forta të skuadrës kuqezi, shkruan shkodrasport.com

Aleksandër Trumçi është një prodhim i akademisë Shkodra dhe në karrierën si profesionist fillimisht është aktivizuar tek Veleçiku. Në vendin tonë u bë i njohur me fanellën e Bylis, ku qëndroi për 4 sezone e madje duke u graduar edhe si kapiten i mallakstriotëve. Në verën e shkuar, me këmbënguljen e trajnerit Jeton Beqiri që drejton Shkëndijën, Trumçi iu bashkua tetovarëve për një shifër prej 50 mijë eurosh të paguar ndaj Bylis.

Në Tetovë ai menjëherë është shndërruar në një nga lojtarët më të dashur nga tifozeria. Duke vijuar edhe traditën pozitive të futbollistëve shkodranë që janë aktivizuar më parë me kuqezinjtë. Ku në të shkuarën emra si: Guri, Hebaj apo Çinari kanë dhënë kontribut të vlefshëm për skuadrën e njohur tetovare.(www.shkodrasport.com)

Nga Endri ÇINARI

Andreas Ndoj, mbrojtësi me origjinë shkodrane, por i lindur dhe rritur në Greqi, kaloi në merkaton e janarit nga Olimpiakos në Portugali. 22-vjeçari kaloi nga rradhët e rekordemenëve të futbollit helen në formën e huazimit tek Rio Ave. Skuadër në të cilën do kishte mundësi të luante në vazhdimësi dhe të shfaqte vlerat e tij.

Dhe duket se kjo lëvizje ka rezultuar e suksseshme për futbollistin e kombëtares greke. Kjo pasi jo vetëm që është përshtatur menjëherë në futbollin grek, duke u shndërruar në një titullar të skuadrës luzitane, por duke mahnitur edhe me paraqitjet e tij. Në rolin e mbrojtësit të qendrës, Ndoji është tashmë një lider në rradhët e ekipit të Rio Aves, shkruan shkodrasport.com

Edhe në ndeshjen e fundit ndaj Bragas ku Rio Ave triumfoi në shifat 2-1, Ndoji ishte një nga më të mirët në fushë. Për performancën e tij shkodrani u vlerësua me notën 7.2 e ndërsa po ashtu i vlerësua edhe në mediat sportive në Portugali. Që prej transferimit në janar tek Rio Ave ku tashmë po luan në vazhdimësi, Ndoji ka qenë një ndër mbrojtësit më të spikatur në kampionat.

Ku ka marrë vlerësime shumë pozitive për performancat e tij. Kujtojmë që ai është një futbollisti formuar në rradhët e Olimpiakos në Greqi, ku me bardhekuqtë ka debutuar që në moshën 18-vjeçare e ndërsa tani për herë të parë në karrierën e tij po luan jashtë Greqisë.(www.shkodrasport.com)

Erald Çinari nuk ndalet në Armeni, duke u shndërruar në personazhin kryesor të ekipit të tij, Noah. Shkodrani edhe një herë ditën e sotme është paraqitur nga minuta e parë në formacion me ekipin bardhezi. Duke mos zhgënjyer aspak me performancën e tij.

Në përballjen me Shirak në kuadër të javës së 19-të në Armeni, mëngjërashi ishte protagonist absolut në 45 minutat e para për ekipin e Mottas. Fillimisht në minutën e 24-të, 28-vjeçari do rrëmbente një top në mesfushë dhe me një pasim diagonal prezanton Gregorion përballë portierit kundërshtar. Me portugezin i cili shfrytëzon në maksimum asistin e Çinarit, për të kaluar në avantazh ekipin vendas.

Nuk do vononte shumë dhe pas asisitit, ish-futbollisti i Vllaznisë do gjente edhe rrjetën personale. Pasi në minutën e 26-të, një krosim i ardhur nga e djathta e gjen në zonë, ku me një shkëputje të bukur me kokë ai e dërgon topin në rrjetë.

Ky ishte edhe goli i 11-të sezonal për Çinarin në Armeni, ku ka dhënë edhe 5 asiste deri më tani. Me sulmuesin i cili po përjeton sezonin e tij më të mirë në karrierë dhe po shkon i sigurt drejt titullit kampion në Armeni me skuadrën e Noahs.(www.shkodrasport.com)

Erald Çinari e rinis vitin 2025 aty ku la atë 2024. Duke shënuar në vazhdimësi në kampionatin e futbollit në Armeni. Sulmuesi shkodran është rikthyer në aktivitetin e ndeshjeve zyrtare me ekipin e Noahs, ku kampionati armen ka rinisur vetëm ditën e sotme fazën e dytë dhe përfundimtare të sezonit.

Për t’u kthyer tek Çinari, ai u shfaq menjëherë protagonist që në minutat e para të vitit 2025. Mëngjërashi i cili u prezantua si titullar në ndeshjen e javës së 17-të mes West Armenia dhe Noah gjeti golin në minutën e 11-të të takimit.

Ish-futbollisti i Vllaznisë shfrytëzoi mjaft mirë një kros të ardhur nga e majta. Ku thuajse i vetëm në zonë e kaloi topin pas shpatullave të portieri kundërshtar.

Duke kaluar në këtë mënyrë në avantazh skuadrën bardhezi. Kjo ishte edhe rrjeta e 9-të për 28-vjeçarin këtë sezon në elitën e futbollit në Armeni. Ku gjithashtu ish-sulmuesi edhe i Partizanit në vendin tonë numëron edhe 4 asiste. Statistika me të vërtetë për t’u duartrokitur për shkodranin që po kalon një moment të artë forme në Armeni.(www.shkodrasport.com)

Nga Maringlen ZHIVANI

Futbollisti shkodran Belajdi Pusi do të jetë pjesë e futbollit rus për pjesën në vazhdim të karrierës së tij. 27-vjeçari ka lënë Azerbajxhanin për t’u bashkuar me skuadrën e FC Fakel Voronezh, ekip që militon në ligën më të lartë të futbollit rus dhe momentalisht ndodhet në vendin e 14-të të renditjes me 14-pikë.

Ky klub ka blerë kartonin e Pusit për 150-mijë euro, teksa edhe sulmuesi shkodran nga ana e tij do të ketë përfitime financiare të mëdha me kontratën që do të zgjasë dy vite e gjysmë. Një lëvizje e rëndësishme kjo për Pusin, ku pas eksperiencave në Azerbajxhan, ai transferohet në Rusi. Kjo lëvizje ka ardhur edhe si rrjedhojë e punës së menaxherit, Alsid Tafili, raporton shkodrasport.com

Ish-mesfushori i Vllaznisë, tashmë me një rol të ri në karrierën e tij, ka realizuar transferimin e rradhës. Në bashkëpunim me kompaninë e menaxhimit, DD Management Group, Tafili ka bërë të mundur këtë lëvizje. Pas lëvizjeve në verë dhe në janar që zhvilloi, tashmë Tafili duket shumë aktiv edhe në këtë periudhë.

Patjetër kjo lëvizje është e rëndësishme si për karrierën e Pusit, por edhe për Tafilin dhe bashkëpunëtorët e tij që dalëngadalë po bëhen protagonistë në botën e menaxhimit. Megjithatë, puna e tyre duket se nuk do të ndalet me kaq, pasi lëvizje të tjera të rëndësishme priten për futbollistët, të cilët Tafili i ka në menaxhim.

Kujtojmë që, edhe tek Vllaznia ai ka në menaxhim një prej futbollistëve më të mirë të kampionatit, siç është Esat Mala apo edhe emra të tjerë si Gledjan Pusi dhe Renato Malota tek Egnatia. Tashmë, në të ardhmen, Alsid Tafili dhe bashkëpunëtorët e tij po përgatiten për lëvizjet e rradhës.(www.shkodrasport.com)