Elbasani i ka dhënë fund përgatitjeve për njërën nga sfidat më të forta të këtij fillim sezoni, përballjen me kampionët në fuqi, Egnatian. Pas fitores në debutim kundër Flamurtarit, verdheblutë kërkojnë të konfirmojnë ecurinë pozitive, ndërsa trajneri Ivan Gvozdenoviç ka dhënë mesazhe qartësisht të balancuara. Në prononcimin e dhënë enkas për “Panorama Sport” para kësaj sfide ai shpreh respekt për rivalin, por mbi të gjitha fokusin e ka tek puna e skuadrës së tij.
”E respektojmë shumë Egnatian, pasi kanë një skuadër shumë të mirë dhe jo më kot janë dy herë radhazi kampionë të vendit. Megjithatë, ne do të mendojmë për veten tonë dhe si në çdo ndeshje do të bëjmë maksimumin. Për Elbasanin, çdo kundërshtar vlerësohet maksimalisht, kemi besim në forcat tona dhe jemi gati për këtë ndeshje, si psikologjikisht, fizikisht, ashtu dhe taktikisht”, u shpreh fillimisht kreu i pankinës verdheblu. Kështu, Elbasani nuk shkon në Rrogozhinë për t’u dorëzuar përballë një skuadre kampione, por as nuk e nënvlerëson kundërshtarin.
FORMACIONI, ENDE I HAPUR – Gvozdenoviç nuk zbulon kartat për përbërjen e skuadrës, duke lënë hapësirë për surpriza deri në momentin e fundit. Kjo tregon fleksibilitetin e trajnerit dhe gatishmërinë për të përshtatur planin e lojës në varësi të kundërshtarit dhe formës së lojtarëve. Mesa duket, Elbasani duket se nuk do të ketë një formacion të “ngrirë”, por një ekip që mund të ndryshojë sipas kërkesave të ndeshjes. ”Sa i përket formacionit, dihet që çdo gjë është e hapur. Mund të bëjmë edhe ndonjë lëvizje, por kjo do vendoset pasi të shohim edhe stërvitjen e fundit dhe pas konsultimit me stafin”, sqaroi më tej serbi.
HARMONIA NË EKIP – Trajneri i verdhebluve ndalet edhe te afrimet e merkatos, duke vlerësuar jo vetëm cilësinë, por edhe harmoninë që ata kanë sjellë në grup. Integrimi i shpejtë i lojtarëve të rinj është një tregues se ekipi po ndërtohet mbi baza solide dhe se ka një atmosferë të shëndetshme brenda dhomave të zhveshjes. ”Të rinjtë deri tani janë integruar shumë mirë dhe jam i sigurt që edhe tifozët janë të kënaqur. Unë jam i kënaqur me të gjithë lojtarët, jo vetëm me të afruarit”, vijoi më tej Gvozdenoviç.
VAZHDIMËSIA – Fitorja ndaj Flamurtarit i dha skuadrës moralin e duhur, por Gvozdenoviç nuk lejon që lojtarët të pushojnë mbi dafina. Ai e sheh sezonin si një garë afatgjatë, ku çdo ndeshje duhet trajtuar me seriozitet të plotë. Për trajnerin, dy fazat e para të kampionatit janë vendimtare për të ndërtuar vazhdimësi dhe stabilitet në renditje. Sfida me Egnatian shihet si një test i vërtetë për forcën reale të verdhebluve. ”E kam thënë edhe para ndeshjes me Flamurtarin që ishte shumë e rëndësishme ta nisnim kampionatin mbarë. Falenderoj djemtë, sepse bënë një ndeshje të mirë dhe e merituam ta fitonim. Mirëpo, vazhdimësia është shumë e rëndësishme. Dy fazat e para kanë shumë rëndësi, sepse vlejnë shumë për vazhdimësinë. Megjithatë, detyra jonë është që t’i marrim ndeshjet një e nga një dhe fokusi ynë është tek Egnatia”, mbylli prononcimin e tij për gazetën tekniku i Elbasanit.
