Në prag të sfidës kundër Angers, ndeshjes së parë të sezonit në “Parc des Princes”, e vlefshme për javën e dytë të Ligue 1, trajneri spanjoll Luis Enrique foli në konferencë për shtyp, duke prekur tema të nxehta rreth PSG. Ai shpjegoi zgjedhjen për ta përjashtuar Gianluigi Donnarumma nga projekti i kampionëve francezë dhe europianë në fuqi: “Ishte një vendim i komplikuar, por nuk dua të hyj në detaje publikisht. I kuptoj kritikat, por jemi të qetë dhe e dimë ku duam të arrijmë”.
Preferenca për Lucas Chevalier u arsyetua nga aspektet taktike dhe karakteriale: “Donim një portier që të na japë superioritet me topin, të lexojë presionin e kundërshtarit, të mbulojë linjën mbrojtëse, të dominojë lojën ajrore dhe t’i udhëheqë mentalisht shokët e skuadrës. Kjo është ajo që kërkoj edhe nga Safonov dhe Renato, përveç menaxhimit të situatave tipike të një portieri”.
Për ndryshimet krahasuar me sezonin e kaluar, trajneri iberik mbajti rezerva: “Të ndryshosh gjithçka, të mos ndryshosh asgjë, kjo është dilema e çdo trajneri. Modifikimet nuk janë publike, janë pjesë e punës sonë. Duhet të jemi të paparashikueshëm dhe të kemi më shumë opsione”.
Ai foli edhe për Ousmane Dembélé: “Për të, ky sezon është një sfidë e madhe. Sezonin e kaluar ishte i jashtëzakonshëm, por jam i bindur se mund të përmirësohet edhe më shumë. Ka cilësitë për të qenë lojtar kyç për ne”.
Për kthimin e të luajturit në shtëpi: “Na kanë munguar shumë, me tifozët tanë do të jemi më të fortë. I kemi zhvilluar 10 ndeshjet e fundit zyrtare jashtë, tani është koha të shijojmë stadiumin tonë dhe mbështetjen e tifozëve”.
Për merkaton, Luis Enrique konfirmoi: “Kubi ynë do të mbetet vigjilent deri në ditën e fundit, gati për çdo skenar”./telesport/
