Nga Maringlen ZHIVANI
Edi Martini ka vendosur të mbështesë të rinjtë e Vllaznisë. Një ndër ta është edhe Gerald Kubazi. Ende pa i mbushur akoma 19 vjeç, Kubazi mori vendin e Alfred Mensah në sfidën e para tre ditëve.
Në fakt, ishte minuta e 71-të e ndeshjes me Daugavpils në Letoni, kur sulmuesi debutoi me kuqeblutë dhe duhet të merrte përgjegjësi, pavarësisht moshës së tij të re.
Kubazi u aktivizua në krahun e djathtë të sulmit, teksa atij iu dha besimi i duhur nga ana e trajnerit Edi Martinit. Gjithsesi, mes presionit dhe emocioneve, Kubazi shkroi emrin e tij në historinë e Vllaznisë, pasi që në debutimin e tij të parë e nisi me një asist për Kevin Dodajn, i cili më pas realizoi golin e përmbysjes të rezultatit të ndeshjes.,
Vetë trajneri Martini e deklaroi pas ndeshjes në Letoni se ai nuk do t’i shikojë futbollistët e tij nga mosha, i ri apo i vjetër. Ai që do ta bindë atë në stërvitje, do të jetë në fushën e lojës edhe në ndeshje dhe shembulli i Kubazit pritet të ndiqet edhe me të tjerë.(www.shkodrasport.com)
