Debati i gjatë për më të mirin në historinë e futbollit ka marrë fund, të paktën sipas Federatës Ndërkombëtare të Historisë dhe Statistikave të Futbollit (IFFHS). Ky institucion prestigjioz, që prej vitit 1991 analizues i të dhënave në shkallë globale, e ka shpallur Lionel Messin si futbollistin më të mirë të të gjitha kohërave.
“Pleshti” nga Rosario kryeson një renditje ku ndodhen legjenda si Pelé, Diego Armando Maradona, Johan Cruyff dhe rivali i tij historik Cristiano Ronaldo. Por askush nuk i qëndron përpara argjentinasit.
Në moshën 37-vjeçare, Messi, aktualisht pjesë e Inter Miami-t, ka në arkivën e tij 46 trofe dhe një rekord prej 8 “Topa të Artë”, një arritje e paprecedentë. Ai është vlerësuar për rregullsinë, ndikimin total në lojë dhe dominimin shumëvjeçar në skenën botërore, duke bindur IFFHS që t’i japë kurorën e “më të madhit të të gjithëve”.
Pelé dhe Maradona pas Messit
Në vendin e dytë renditet Pelé, legjenda braziliane me tri Kupa Bote, një rekord i pakapërcyer. Edhe pse në kohën e tij nuk mund të fitonte “Topin e Artë”, një vlerësim retrospektiv i ‘France Football’ në 2016 tregoi se ai do ta kishte fituar shtatë herë.
Podiumin e mbyll Diego Maradona, gjeniu argjentinas që ndryshoi historinë e futbollit me magjinë e tij. Edhe ai, si Pelé, u penalizua nga rregullorja e dikurshme e “Topit të Artë”, por trashëgimia e tij mbetet e paharrueshme.
Në fund, përtej shijeve dhe preferencave, IFFHS ka folur qartë – dhe sipas saj, Leo Messi është emri që qëndron mbi të gjithë në historinë e futbollit.
