Carlo Ancelotti (6), Marcello Lippi (4), Nereo Rocco (2), Giovanni Trapattoni (2), Arrigo Sacchi (2), Fabio Capello (2), Massimiliano Allegri (2)…, tani edhe Simone Inzaghi. Fitorja epike ndaj Barcelonës (4-3) i mundëson trajnerit të Interit hyrjen në “Hall of Fame” të trajnerëve italianë, që kanë drejtuar të paktën dy finale të Ligës së Kampionëve.
Vëllai më i vogël i “Pippo”-s ka gjetur në pankinë lavdinë që dëmtimet ia mohuan si futbollist. Megjithatë, si lojtar shënoi 90 gola dhe fitoi gjithçka në nivel vendas: një kampionat, tri Kupa të Italisë dhe një Superkupë. Si trajner, si me Lazion, ashtu edhe me Interin, ka fituar gjithçka: një kampionat, tri Kupa të Italisë dhe pesë Superkupa. Askush nuk ka më shumë se ai.
“Doja t’i dhuroja babait një javë të përsosur,” – pati thënë pas ngjitjes së “Pippo”-s në Serie A me Pisa. Dhe ashtu ndodhi. Simone tashmë ka luajtur një finale Champions-i, humbja 1-0 ndaj Manchester City më 2023. Tani është momenti për ta mbyllur ciklin dhe përmbushur profecinë e Guardiolës.
“Dua t’i them Inzaghit se ajo që ndjen tani, e ndjemë edhe ne dy vite më parë (kur City humbi ndaj Chelsea). Duhet të mendojë se po drejton skuadrën e dytë më të fortë në Europë, do të rikthehet në finale. Kështu është sporti: ndonjëherë fiton, ndonjëherë humb…”, – parashikoi Guardiola.
Pas ndeshjes së parë ndaj Barçës, Guardiola tha sërish: “Simone është i nënvlerësuar, madje shumë. Interi tregoi sërish sa skuadër e jashtëzakonshme është; si mbron, si kalon në kundërsulm, fizikisht dhe organizativisht. Inzaghi është trajner i jashtëzakonshëm”.
Edhe Luis Alberto, ish-lojtar i tij te Lazio, shtoi: “Është nënvlerësuar. Ka evoluar jashtëzakonisht si trajner që nga fillimi i tij. Ka shumë pak trajnerë më të mirë se Simone në menaxhimin e grupit”.
Dhe s’e kanë aspak gabim. Që nga sezoni para ardhjes së Inzaghit (2020-2021), Interi ka humbur emra si Hakimi, Lukaku, Skriniar, Brozovic, Onana…, por s’ka reshtur së rrituri. “Simone është themeli i këtij modeli. Fitorja është e të gjithëve, por meritën më të madhe e ka trajneri”, – ka thënë presidenti Beppe Marotta.
Vetë Simone u shpreh: “Ëndrra ime ishte të bëhesha futbollist dhe arrita të luaj në Serie A e në kombëtare bashkë me vëllain tim, nuk mund të kërkoja më shumë. Si trajner iu jam mirënjohës lojtarëve të Interit dhe Lazios për këtë rrugëtim të mrekullueshëm. Jemi në finale, pak e parashikuan, por shumë i dëgjuam, disa më tepër se të tjerët”.
Në këtë Champions, Interi ka qenë vetëm 10 minuta e 54 sekonda në disavantazh, shifër që tregon sa i fortë është ky ekip. “Inzaghi është lideri ynë. Na tregon rrugën dhe gjithmonë e bën si duhet, edhe në momentet më të vështira. Kjo është forca e tij. E meriton çdo lavdërim”, – tha Dimarco.
Karriera e tij tek Interi është e jashtëzakonshme: një “scudetto”, rikthimi i Kupës së Italisë pas 11 vitesh, tri Superkupa radhazi (për herë të parë në histori), dhe dy finale Champions-i në tri vite (pas 13 vitesh mungesë).
“Skuadra nuk u bë asnjëherë arrogante. E kemi merituar këtë finale. Tani është koha për ta shijuar”, – nënvizoi Inzaghi./telesport/
