Barcelona pati një sezon të shkëlqyer duke fituar tre trofe mes të cilëve më të rëndësishmin, titullin në La Liga. Pasi Ksavi Hernandez hodhi themelet për këtë projekt, Joan Laporta vendosi të ndryshonte kurs dhe të punësonte Hansi Flikun për të udhëhequr ekipin e Barçës.
Në një vendim që në fund rezultoi i duhuri, gjermani e udhëhoqi ekipin katalanas drejt La Ligës, Kupës së Mbretit dhe Superkupës së Spanjës në vitin e tij të parë në Barcelonë. Joan Laporta foli për këtë në një intervistë të gjatë me “La Vanguardia”, në të cilën i dha sezonit një vlerësim “i shkëlqyer” dhe vlerësoi trajnerin gjerman.
Nëse do t’iu duhej të zgjidhnit një moment nga ky sezon, cili do të ishte ai? Këto pyetje janë të vështira, sepse gjithnjë ti zgjedh momentet më të bukura. Por duhet të mendosh dhe për momentet e vështira dhe kapërcimin e vështirësive. Më kujtohen momentet kur ata ndryshuan rregullat e “fair play financiar” dhe për këtë arsye nuk mundëm të regjistronim Dani Olmon dhe Pau Viktorin. Ne kemi qenë të guximshëm dhe rezultatet janë aty. Është në ato momente kur sheh reagimin dhe kupton se në fund ia vlejti gjithçka.
A i ka tejkaluar Hansi Flik pritshmëritë tuaja? Objektivi ishte fitimi i Ligës dhe ia kemi arritur.
Çfarë vlerësoni më shumë te trajneri? Ndjeshmëria e veçantë me të cilën ai ka qenë në gjendje të udhëheqë grupin. Ai e ka marrë atë si një motivim jetësor. Ka aftësinë të të lidhë me projektin, të të bëjë të besosh se je i rëndësishëm. Dhe mendoj se kjo u është transmetuar lojtarëve dhe atyre përreth tyre. Dhe ai është i zgjuar. Ai flet anglisht dhe ky është vendimi i tij, sepse mendoj se e kupton spanjishten, por ndoshta dikush i ka thënë të mos e flasë atë (qesh). Në këtë mënyrë, mund të ndiheni më rehat dhe të sigurt dhe të shmangni përballjet e panevojshme.
Gjithmonë ju ka pëlqyer shkolla gjermane e menaxhimit për këtë Barçë… Gjithmonë më ka pëlqyer stili holandez i Johan Krojfit. Fola me trajnerin gjerman Ralf Ranjik në të cilën ai foli për Johanin. Dhe ai më tregoi për Tuhel, Nagelsman, Klop dhe Flik. Dhe arritëm në përfundimin se më i përshtatshmi mund të ishte Hansi.
Çfarë ka Flik që pjesa tjetër nuk e ka? Të tjerë kishin shumë njohuri, por disa nuk ishin trajnerë klubesh dhe të tjerë nuk dinin si të silleshin mjaftueshëm mirë me yjet. Hansi i plotësonte të gjitha këto kërkesa, ai ishte i mirë në gjithçka.
Çfarë note i jepni këtij sezoni? Shkëlqyeshëm! Sepse jo vetëm që kemi fituar Ligën, por kemi fituar edhe Kupën e Mbretit dhe Superkupën e Spanjës. Dhe është një meritë për ne, sepse e fituam duke luftuar kundër rivalit tonë “par excellence”, edhe pse ishte përforcuar. Por ne kemi qenë më mirë. Tani bëhet fjalë për të vazhduar kështu, duke vlerësuar, duke analizuar skuadrën dhe duke vazhduar të fitojmë.
