Flamurtari dhe Bylis kanë barazuar në ndeshjen e vlefshme për javën e dytë të Superiores. Sfida e zhvilluar në stadiumin “Adush Muça”, përfundoi me shifrat 3-3. Në përfundim të këtij dueli, ka folur trajneri i ballshiotëve, Mirel Josa.
“Më kënaq barazimi për mënyrën si shkoi loja, duke qenë dy herë në disavantazh. Shuajtëm një disavantazh prej dy golash. Në momente të caktuara duhej ta qetësonim lojën dhe të ishim më këmbëngulës. Kishim problemet tona me kartonët që morëm, pasi na futën në ankth. Mund të them se ishte një lojë që mund të merrte drejtime të menjëhershme. Siç mori 3-2 për Flamurtarin, mund të merrte në favorin tonë.
Nuk mund të them që gjendja e lojtarëve ishte jooptimale. Duhej një koordinim më i mirë tek rasti i penalltisë. Por unë mund të them që nuk kishte vetëm problem fizik, duhet të ishim fleksibël, kur Flamurtari mundohej që të organizonte nga poshtë fushës së vet.
Lojtarët besuan tek përmbysja, kur loja u ç’rregullua. Siç mund të shënonim ne, mund ta bënte edhe Flamurtari duke pasur parasysh edhe rastin e Përndrecës që zotëroi topin me dorë, me faullat, që u godit nga Marku dhe Trashi. Unë nuk jam i kënaqur me skuadrën në mbrojtjen, sepse të them të drejtën, goli i 3-të na uli, por ishte iniciativë e ekipit tonë që dolëm në sulm për të barazuar”, tha Josa.
