Nga Endri ÇINARI
Vllaznia ka bërë shumë lëvizje si në hyrje e po ashtu në dalje të merkatos gjatë kësaj vere. Duke ndryshuar goxha fytyrën e skuadrës në krahasim me skuadrën e sezonit të shkuar. Ajo çfarë është vënë re në rradhët e kuqebluve gjatë kësaj merkatoje ka qenë sigurimi i dy futbollistëve thuajse në çdo pozicion të fushës. Në mënyrë që rolet të jenë të dubluara në raste mungesash për kartonat apo dëmtimet gjatë sezonit të Superiores.
Kështu në portë aktualisht në rradhët e shkodranëve janë 3 futbollistë si: Jukaj, Phols dhe Bunjaj. Të cilët japin siguri për ekipin e Martinit në katërkëndor. Mbrojtja është reparti ndoshta me më pak futbollistë që mund të dublohen duke pasur parasysh skemën me 3 që përdor trajneri Martini. Ku si titullarë mund të konsiderohen Bajrami, Gjini dhe Kuros. Të cilët në rast nevoje apo rotacioni mund të zëvendësohen edhe nga Gurishta apo Pusi.
Në krahun e majtë ka siguri me emra si: Jago apo Hakaj teksa edhe djathtas, Gurishta dhe ndonjëherë Mala japin me të vërtetë kualitet dhe eksperiencë. Me këtë të fundit që mund të përdoret edhe në mesfushë, që është edhe reparti më i mbipopulluar tek Vllaznia. Ku emra si Krymi, Dros, Sala, Qato, Kallaku, Tafili dhe Murataj duhet të “luftojnë” fort mes tyre për të siguruar 3 vendet në formacion, bazuar në skemën 3-5-2 që aplikon Martini.
Sulmi po ashtu ka opsione me dyshen Balaj – Kastrati që në letër konsiderohen si titullarë. Teksa si një alternativë në repartin e avancuar mund të cilësohet edhe Mensah e ndërsa shansin e tyre gjatë edicionit do presin edhe Kubazi e Ara. Dy futbollistë të ardhur rishtazi nga rradhët e akademisë kuqeblu dhe që deri më tani kanë bindur trajnerin Martini. Një skuadër kjo e plotësuar e Vllaznisë këtë edicion që ka mundësi dhe opsione të shumta për të interpretuar në fushën e lojës.(www.shkodrasport.com)
