Një penallti e Jasir Asanit ka siguruar fitoren për Shqipërinë eksperimentale të hedhur sot në fushë nga Silvinjo në duelin miqësor ndaj Gjibraltarit në transfertë.
Në një ndeshje ku Silvinjo ruajti duke mos aktivizuar titullarët e paprekshëm, me ndryshime të mëdha nga porta në sulm, kuqezinjtë ishin “në gjumë” në pjesën e parë, me sinjalet e vetme drejt portës që erdhën nga gjuajtjet e Berishës i cili goditi edhe traversën.
Situata ndryshoi në pjesën e dytë, kur nga fusha u larguan Broja e Daku, për t’i bërë vend Hoxhës e Shpendit, që shtuan shpejtësinë në repartin e avancuar me raste radhazi që u krijuan para portës kundërshtare.
Fatin e ndeshjes e vendosi një penallti e fituar nga Shpendi dhe e ekzekutuar nga Asani, që i dha kësisoj avantazhin kuqezinjve të cilët e administruan deri në fund, duke dalë me një fitore minimale nga kjo miqësore.
GJIBRALTAR-SHQIPËRI 0-1
69′ (p) Asani
