Nga Endri ÇINARI
Fitorja e parë e Vllaznisë ndaj Egnatias në shifrat 2-0 në kampionat u vendos nga golat e dy mbrojtësve si Gurishta dhe Bajrami. Me repartin e prapavijës që ishte vendimtar me performancën e tij në suksesin e parë sezonal të skuadrës së Martinit. Kjo duke lënë disi në “hije” sulmuesit dhe repartin e avancuar të kuqebluve, që pavarësisht kontributit të tyre në fushën e lojës nuk arritën të gjenin golat në përballjen ndaj rrogozhinasve.
Madje Balaj kishte mundësinë e artë që ta niste edicionin e ri me gol, ku shpërdoroi një penallti në minutën e 34-ët përballë Dajsinanit. Megjithatë duhet theksuar se momentalisht 34-vjeçari është i “vetëm” në sulmin e Vllaznisë. Pasi nga futbollistët e repartit të avancuar është i vetmi që ka një formë të mirë fizike dhe që garanton për një performancë pozitive. Teksa Murataj që në ndeshjen ndaj Egnatias luajti në dyshe me Balajn, nuk është një sulmues tipik.
Me 23-vjeçarin që njihet për rolet e tij si mesfushor pas sulmuesve apo edhe si mesfushor krahu. Nga ana tjetër edhe Mensah, i cili është një sulmues tipik nuk konsiderohet nga ana e Martinit, i cili e sheh ganezin vetëm si një alternativë momentalisht. Pra, duke mos garantuar në 100% të performancës së tij. E po ashtu duhet edhe pak kohë edhe për Kastratin, me sulmuesin kosovar që duhet të arrijë gjendjen optimale fizike.
E pastaj të bëhet një analizë rreth performancës së tii në fushën e lojës. Aktualisht Bekim Balaj, kapiteni i skuadrës është i vetmi sulmues tek i cili mund të kesh “besim” në këto momente. Me shtatëlartin që vijon të jetë lideri i padiskutueshëm i 9 herë kampionëve të vendit tonë.(www.shkodrasport.com)
