Ndeshjet kualifikuese të kompeticioneve europiane do hapin aktivitetin e ekipeve shqiptare për sezonin 2025-26 dhe përjashtim nuk bën as Vllaznia. Me nënkampionët e Superiores që do e nisin aventurën e tyre europiane me një duel dysh kundër skuadrës së Daugavpils nga Letonia. Një duel ku në letër kuqeblutë shihen si favoritë për të kaluar në turin e dytë dhe ku realisht ky është një objektiv i klubit.
Kjo pasi 9 herë kampionët e vendit tonë nuk duan të përsërisin gabimet e dy sezoneve të fundit, ku u eleminuan nga skuadra modeste si Lindfield apo Valur. Shkodranët nuk arrijnë të kalojnë një tur në kompeticionet europiane që nga sezoni 2021-22, ku triumfonin me një përmbysje ndaj Siroki Brijeg. Në takimin e parë shkodranët mposhteshin me rezultatin 3-1 në Bosnje, ku shpresa për një përmbysje jepte vetëm një gol i Mehdi Çobes në fundin e 90 minutave të para.
Në kthim do ishte një Vllazni e “zjarrtë” që edhe më mbështetjen e jashtëzakonshme të tifozëve në “Loro Boriçi”, arriti të fitonte me rezultatin 3-0. Duke përmbysur gjithçka falë një dopietë të Djurjdeviç dhe një goli të Eni Imamit, që do i siguronin kuqebluve kalimin në turin e dytë të atij sezoni të Conference League, ku më pas u eleminuan nga AEL Limasol i Qipros. Që nga ai duel, Vllaznia nuk ka arritur të kalojë asnjë kundërshtarë në Europë.
Ku në sezonin pasardhës do e gjente veten të kualifikuar direkt në turin e dytë, duke pasur përballë rumunët e Krajova. Ndaj të cilëve u mposht me rezultatin e përgjithshëm 4-1. Edhe në edicionet 2023-24 dhe 2024-25, shkodranët nuk arritën të kishin sukses, duke u eleminuar që në turet e para të Conference League. Tashmë me pjesëmarrjen e 5-të rradhazi në Europë në sezonet e fundit, ekipi i Martinit kërkon të “thyejë” këtë tabu dhe të kërkojë kalimin në turin e dytë të Conference League.
