Arbin Zejnullai ishte kthyer në një nga emrat më të lakuar të merkatos së futbollistëve në vendin tonë, pasi mesfushori i cili ka qenë një nga shtyllat e Egnatias në vitet e fundit, doli lojtar i lirë me përfundimin e kontratës që kishte me rrogozhinasit.
Shumë prej skuadrave të Superiores u vunë në ndjekje të mesfushorit, që do të ishte një përforcim i bujshëm për cilindo ekip duke i dhënë një alternativë të rëndësishme në mesfushë. Megjithatë, futbollisti tetovar duket se ka vendosur të kthehet në “shtëpi”.
“Panorama Sport” mëson se ndjekja e ndeshjes mes Shkëndijës së Tetovës dhe TNS në stadiumin e Shkupit në mbrëmjen e të martës nga futbollisti, nuk ishte rastësore. Zejnullai, i dalë nga radhët e akademisë së kuqezinjve, ka gjetur akordin me klubin e Shkëndijës dhe do të vijojë karrierën atje.
Palët kanë shtrënguar duart, ndërsa tani mbetet formalizimi i kontratës dhe prezantimi i lojtarit, që do të bëhet para kësaj fundjave, në mënyrë që ai të nisë punën me ekipin për vijimin e pjesëmarrjes në kompeticionet europiane.
