Nga Maringlen ZHIVANI
Tashmë është zyrtare…Talenti i ri shkodran, Kevin Dodaj, ka firmosur me gjigandët bullgarë të CSKA Sofias. Sulmuesi i perspektivës, i cili spikati me paraqitjet e tij te Vllaznia dhe u aktivizua së fundmi me ekipin në ndeshjet europiane, tashmë do të vazhdojë karrierën jashtë vendit.
Për Dodajn, ky transferim është një hap i rëndësishëm në rrugëtimin e tij si profesionist, ndërsa CSKA Sofia ka parë te lojtari potencialin e madh që ai ka për t’u bërë pjesë kyçe e projektit të tyre.
Burime pranë klubit konfirmojnë se kontrata është firmosur dhe lojtari është prezantuar zyrtarisht. Dodaj është shitja më e rëndësishme dhe më e shtrenjtë e Vllaznisë në historinë e saj, duke përforcuar edhe njëherë faktin se Akademia kuqeblu vazhdon të prodhojë talente që tërheqin vëmendjen e klubeve ndërkombëtare.
Ndërkohë, gazeta ‘Shkodra Sport’ mëson se Dodaj edhe te CSKA Sofia do të mbajë të njëjtin numër në fanellë si te Vllaznia, pra numrin 22.
