Pasi u eliminua në turin e parë të Champions League nga Banja Luka, Egnatia tashmë nis rrugëtimin në turin e dytë të Conference League. Rrogozhinasit do të përballen me kampionët e Islandës, Vikingur Reykjavik.
Një ndeshje mes kampionësh, me Edlir Tetovës që buzëqesh disa ditë para ndeshjes së parë.
Egnatias i rikthehen dy pika kyçe të ekipit, si Edison Ndreca apo Arbin Zejnullai.
Si mbrojtësi i majtë ashtu dhe mesfushori munguan në ndeshjen e kthimit përballë Banja Luka, pasi në të parën u ndëshkuan me karton të kuq. Tashmë koha e dënimit ka përfunduar, me dy yjet e Egnatias që janë gati për të kontribuar në ekip.
