Simone Inzaghi ka nënshkruar zyrtarisht kontratë me klubin saudit Al Hilal, duke u bërë trajneri i ri i ekipit për tri vitet e ardhshme.
Lajmi u konfirmua nga gazetari i njohur i futbollit, Fabrizio Romano, përmes një postimi në platformën X, ku shkruante: “Simone Inzaghi do të firmosë këtë javë si trajner i ri i Al Hilal, ja ku shkojmë”. Inzaghi, i cili deri tani drejtonte Interin, vendosi të largohet nga klubi italian pas një takimi të fundit me drejtuesit e Interit, i zhvilluar sot.
Ky vendim vjen pas humbjes së rëndë 5-0 të Interit ndaj PSG-së në finalen e Ligës së Kampionëve, një rezultat që nxiti presion të madh për largimin e tij.
Sipas burimeve të ekspertit italian, Al Hilal i ka ofruar trajnerit italian një pagë të konsiderueshme, duke e bërë atë një nga trajnerët më të paguar në botë.
Al Hilal, një nga klubet më të suksesshme në Lindjen e Mesme me 19 tituj kampion në Arabinë Saudite dhe 8 trofe në Ligën e Kampionëve të Azisë, po vazhdon strategjinë e tij për të tërhequr talente globale. Ky transferim shënon një kapitull të ri për Inzaghin, i cili pritet të sjellë eksperiencën e tij të pasur taktike në klubin saudit.
Reagimet në rrjetet sociale kanë qenë të ndryshme. Disa tifozë e kanë quajtur lëvizjen e Inzaghit si “të turpshme”, duke e akuzuar se po ikën pas humbjes në finale, ndërsa të tjerë, veçanërisht tifozët e Al Hilal, e kanë mirëpritur lajmin me entuziazëm, duke e konsideruar atë si një hap të madh për klubin.
Inzaghi pritet të prezantohet zyrtarisht nga Al Hilal në ditët në vijim, ndërsa Interi tashmë ka nisur kërkimin për një trajner të ri për të zëvendësuar italianin. /Telegrafi/
