Të besuarit e Martinit do të kërkojnë të vijojnë me paraqitjet pozitive dhe rezultatet pozitive pas debutimi me fitore kundër Egnatias në shifrat 2-0. E pikërisht trajneri shkodran duket se do t’i besojë formacioni fitues ndaj rrogozhinasve edhe ndaj Dinamos. Kështu duket se 50-vjeçari i qëndron idesë që formacioni fitues nuk ndryshohet.
Ndaj Dinamos kështu nga porta pritet ta nisë sërish Jukaj, që bindi ndaj Egnatias. Në mbrojtje po ashtu nuk pritet të ketë ndryshime në rreshtimin me 3, ku emra si: Bajrami, Kuros dhe Gjini. E ndërsa nga krahët në të djathtë pritet Gurishta e ndërsa majtas si zakonisht Jago.
Mesfusha është reparti ku mund të ketë ndonjë dilemë pas rikthimit të Krymit, pavarësisht se Dros duket në avantazh ndaj shkodranit për një fanellë titullari. Teksa repartin do e kompletojnë edhe Qato e Mala, me këtë të fundit që do jetë disi më i avancuar. Në sulm si gjithmonë do udhëheqë Balaj, me shtatlartin që do ketë mbështetjen e Muratajt.
Me këtë të fundit që ishte një ndër më të mirët në fushë ndaj Egnatias dhe që momentalisht duket se fiton duelin me Kastratin. Ky pritet të jetë formacioni i mundshëm i shkodranëve, duke përjashtuar ndonjë surprizë të Martinit në minutat e fundit para nisjes së sfidës.
Skuadra Anti-Vllaznia
Dinamo e nis sezonin e ri në Superiore në “Elbasan Arena” ndaj Vllaznisë, teksa përveç trajnerit Ilir Daja që do të mungojë si pasojë e pezullimit në fundin e sezonit tjetër, një tjetër mungesë e rëndësishme pritet të jetë ajo e Klevi Qefalisë.
Mesfushori u largua i dëmtuar nga ndeshja ndaj Jagellonias, teksa me shumë gjasa do ta nisë nga stoli edhe Bruno Dita i cili gjeti minuta në Europë, por stafi mund të mos e rrezikojë në ndeshjen e parë. Në qendër të mbrojtjes, pritet që të jenë Aliji dhe Meksi, të ndihmuar nga Lorran e Nani në krah. Në mesfushë, Gasama, Vila e Beqja, do të ndihmojnë treshen e sulmit që mund të përbëhet nga H. Berisha, Bregu e B. Berisha.
