Nga Maringlen ZHIVANI
Vllaznia po kalon për momentin një periudhë qetësie. Tek ekipi kuqeblu ende nuk ka nisur puna për ndërtimin e skuadrës për sezonin e ardhshëm, aty ku sigurisht që do të synojnë që të jenë sërish pretendentë. Çështja e parë që zgjidhën ishte ajo e trajnerit, me Martinin që do të jetë në krye të stolit të Vllaznisë për këtë sezon.
Pas ardhjes së Edi Martinit në pankinë, mësohet se është vendosur edhe drejtori i ri i sportiv, i cili do të jetë Vioresin Sinani. Tashmë, Martini dhe Sinani kanë nisur të shohin edhe alternativat e mundshme për përforcimin e skuadrës. Burimet pohojnë se ka pasur takime mes trajnerit Martini, drejtorit Sinani dhe presidentit Xhaferi, ku janë diskutuar për ata që do të largohen, por edhe për dëshirat e trajnerit shkodran sa i takon afrimeve.
Ajo që për momentin dihet është se drejtuesit e Vllaznisë do të synojnë afrime me cilësi që të përforcojnë ekipin. Megjithatë, pa shkuar ende tek emrat konkretë, faza e parë është ajo e zbulimit të roleve, ku ka nevojë ekipi për përforcime. Nga sa mësohet, gjithçka do të nisë nga qendra e mbrojtjes. Me largimin e Stojanoviç dhe Juriç, kuqeblutë janë vendosur në kërkim të qendërmbrojtësave. Për momentin, shkodranët kanë në qendër të këtij Serjan Repajn, që luajti në disa ndeshje.
Paraqitjet e tij kanë qenë të mira dhe në nivel, ku u aktivizua në gjashtë ndeshje si titullar. Mirëpo, në klub janë të hapur në merkato për të afruar edhe qendërmbrojtës të tjerë, duke qenë se edhe Melos Bajramit i ka përfunduar kontrata dhe me gjasë, edhe ai do të largohet nga Vllaznia. Roli tjetër që po kërkohet është edhe ai i një mesfushori organizator, një numër “10” që për momentin mungon tek Vllaznia, pas largimit të Kahrimanoviç.
Në fakt, mbetet e vështirë për t’u gjetur një fantazist, sepse janë me “pikatore”, por duket se Vllaznia për t’u bërë pretendente e ka me të vërtetë të nevojshme. Për këtë pozicion janë duke u menduar alternativa jashtë vendit, ndërsa një nga emrat që është lakuar është edhe ai i Sherif Kallakut. I vetmi që jep garanci për golat në sulm duket se është Bekim Balaj dhe shkodranët nuk duan të varen nga këmbët e një futbollisti në një kampionat të gjatë, duke marrë në konsideratë se edhe Mensah është drejt largimit.
Gjetja e një bomberi është një nga objektivat dhe një nga emrat që është lakuar është ai i Florenc Farrukut. Ky i fundit e ka shfaqur dëshirën e tij për t’u bërë pjesë e Vllaznisë dhe nëse drejtuesit e kontaktojnë, praktikisht është një histori e mbyllur që do të jetë pjesë e kuqebluve. Nëse gjërat nuk shkojnë siç duhet me Farrukun, atëherë do të shihen alternativa të tjera në majën e sulmit.(www.shkodrasport.com)
