Presidenti i nderit i Bayernit të Mynihut, Uli Hoeness, nuk e fshehu mendimin e tij gjatë emisionit Doppelpass në televizionin gjerman Sport1. Ai kritikoi hapur tepricat financiare në futboll dhe solli si shembull negativ situatën e FC Barcelonës.
Hoeness theksoi se një klub duhet të shpenzojë aq sa ka në arkë, duke ironizuar gjendjen financiare të katalanasve:
“(Max Eberl) do të kishte dashur të blinte një lojtar, por ne e dimë çfarë kemi në kasë. Kjo është po aq e rëndësishme sa suksesi sportiv. Ja ku është shembulli i Barcelonës. Nëse blen, blen dhe blen… papritur ke me qindra milionë euro borxhe. Atëherë, lamtumirë.”
Tensionet me Max Eberl
I pyetur për përplasjet e raportuara mes tij dhe drejtorit sportiv, Max Eberl, gjatë merkatos, Hoeness pranoi se ka pasur mosmarrëveshje, por i quajti normale:
“Edhe me Rummeniggen shpesh grindeshim, por kur mbyllej dera gjithçka ishte në rregull. Max është disi më i ndjeshëm.”
Ai hodhi poshtë zërat për një dorëheqje të mundshme të Eberl, duke thënë se kjo çështje “nuk ka qenë kurrë temë në këshillin drejtues”.
Mbrojtje për merkaton e Bayernit
Edhe pse Bayerni nuk arriti të siguronte Florian Wirtz dhe Nick Woltemade, që përfunduan në Premier League, Hoeness e vlerësoi pozitivisht punën e klubit:
“Presioni mbi Eberl ishte i madh, por ne kemi një skuadër shumë të fortë. Jemi fituesit e vërtetë të kësaj merkatoje.”
