Mbrojtësi shkodran Gabriel Rroku ka vendosur që në sezonin e ri të luajë për ekipin e Basanias. Që prej javës së kaluar ai ka nisur stërvitjen bashkë me pjesën tjetër të lojtarëve dhe madje ka luajtur edhe në miqësoren e para dy ditëve ndaj Vllaznia U19.
Fakti që edhe tek Burreli sezonin e kaluar nuk gjeti hapësirat e duhura për të qenë një titullar i padiskutueshëm, e kanë detyruar 20 vjeçarin që të shohë për një mundësi tjetër dhe si rrjedhojë pas një bisede me drejtorin teknik Fatjon Hasani dhe presidentin Ermir Shimaj, është bindur që të bëhet pjesë e Basanias për sezonin e ri.
Ish- kapiteni i Vllaznia U19 pritet të jetë një pikë e fortë në prapavijën e kësaj skuadre dhe në dispozicion të trajnerit Haxhiosmanoviç. Rroku padyshim që synon të bëjë një sezon të mirë dhe të tregojë aftësitë e tij dhe kuptohet që Basanian synon ta ketë si trampolinë për ndonjë skuadër tjetër të ndonjë kategorie më lart.
Megjithatë e rëndësishme për të në këto momente është që të marrë sa më shumë minuta dhe të shfaqë vlerat e tij më të mira. Tek Basania kuptohet që ka gjetur një ambient shumë të mirë dhe është mirëpritur nga të gjithë.
Fakti që drejtuesit e këtij klubi po i japin prioritet elementit të ri, është diçka shumë pozitive dhe si rrjedhojë edhe 20 vjeçari Gabriel Rroku do ta shfrytëtojë këtë gjë.(www.shkodrasport.com)
