Nga Endri ÇINARI
Për Vllazninë në ndeshjen miqësore kundër Deçiçit ishin vetëm 2 futbollistë të cilët nuk zbritën për asnjë minutë në fushën e lojës. Ata ishin Esat Mala dhe Elmando Gjini, me mesfushorin dhe mbrojtësin që nuk u konsideruan aspak për këtë duel. Nga sa bëhet e ditur ky ka qenë thjesht një vendim taktik i trajnerit Martini, që ka dashur të provojë futbollistë të tjerë në rolet që mbulojnë dy lojtarët e sipër përmendur. Pasi të dy konsiderohen si titullarë absolutë të formacionit kuqeblu.
Në këtë mënyrë për asnjërin prej tyre nuk ka probleme fizike, të cilat mendoheshin se i kishin lënë jashtë sfidës me tuzianët. E po ashtu të dy lojtarët kanë “shijuar” një ditë më shumë pushimi se sa kolegët e tyre të cilët zbritën në fushën e lojës. Për Vllazninë në këtë miqësore munguan edhe Kristian Dros dhe portieri, Aron Jukaj.
Po ashtu edhe kjo dyshe jo për shkak të lëndimeve fizike, por për arsyen e angazhimit të tyre me kombëtaret. Ku mesfushori është pjesë e listës së kombëtares së Moldavisë në kuadër të ndeshjeve kualifikuese për Botërorin 2026. E ndërsa Jukaj po ashtu është i grumbulluar për kombëtaren U-21 të Shqipërisë.
Të gjithë këta futbollistët pritet që deri në mesjavë t’i bashkohen grupit të Vllaznisë dhe të rivihen nën urdhërat e trajnerit Martini. Me ish-fantazistin që e ka ekipin e plotë dhe mund të mbështetet në secilin prej elementëve që ka aktualisht në organikë për ndeshjet e ardhshme.(www.shkodrasport.com)
