Vllaznia e femrave vërtetë u mund në ndeshjen gjysmëfinale të grupit 4 nga Dinamo Minsk me rezultatin 1-2, por kjo nuk do të thotë se aventura e saj europiane e këtij sezoni është mbyllur këtu. Nesër ajo do të luajë ndeshjen për vendet 3-4 të grupit ndaj kampiones së Luksemburgut Racing Union dhe në fakt kjo përballje ka një vlerë jo të vogël.
Kjo sepse sipas rregullores së re të UEFA-s, skuadra që do të renditet në vendin e tretë në grupe, pikërisht gjatë turit të dytë të “UEFA Women’s Champions League” do të vijojnë rrugëtimin e tyre në një tjetër kupë, e cila ka lindur këtë sezon dhe emërtohet “Europa Cup”.
Në këtë kompeticion siç është bërë e ditur merr pjesë edhe Partizani, si skuadra e renditur në vendin e dytë të kampionatit shqiptar sezonin e kaluar dhe tashmë Vllaznia ka mundësinë që të jetë edhe ajo pjesmarrëse në këtë tur.
Kjo do të thotë se sfida e nesërme ndaj skuadrës nga Luksemburgu Racing Union ka një vlerë jo të vogël për kampionet e Shqipërisë. Një fitore e Vllaznisë në sfidën që do të nisë në orën 10:00 në stadiumin “Loro Boriçi”, objektivi i vetëm i Vllaznisë do të jetë fitorja dhe kualifikimi direkt në “Europa Cup”.
Një fakt pozitiv është rikthimi në formacion këtë herë i kapitenes Megi Doçi e cila mungoi të mërkurën ndaj Dinamo Minsk për shkak të kartonit të kuq të marrë në ndeshjen e fundit të edicionit të kaluar të Champions League. Nga ana tjetër, luksemburgaseve do t’u mungojë portierja e parë pas kartonit të kuq që mori ndaj Ferencvarosh.(www.shkodrasport.com)
