Barcelona po shqyrton mundësinë për ta rikthyer Marcus Rashford te Manchester United, më pak se dy muaj pasi e huazoi për një sezon të plotë. Rashford iu bashkua kampionëve të Spanjës në korrik në formë huazimi, me klubin që arriti ta regjistronte zyrtarisht në La Liga muajin pasues.
Lojtari anglez ishte më parë lënë jashtë planeve nga trajneri i Manchester United, Ruben Amorim, së bashku me Jadon Sancho, Alejandro Garnacho, Antony dhe Tyrell Malacia.
Megjithatë, sipas një raporti nga El Nacional, drejtuesit e Barcelonës po e shqyrtojnë seriozisht mundësinë për të anuluar huazimin e Rashford për shkak të pakënaqësisë me paraqitjet e tij.
27-vjeçari u aktivizua në tri ndeshjet hapëse të Barcelonës në sezonin 2025/2026 në La Liga, por u zëvendësua në pjesën e parë të ndeshjes kundër Levantes më 23 gusht, në një ndeshje ku skuadra katalanase ishte në disavantazh 2-0, por arriti një përmbysje dramatike 3-2. Një person që nuk është i shqetësuar për formën e Rashford është trajneri i Anglisë, Thomas Tuchel.
Tekniku gjerman e ka përfshirë sulmuesin në listën e tij për dy ndeshjet kualifikuese të Kupës së Botës që Anglia do të zhvillojë këtë muaj kundër Andorrës dhe Serbisë./Telegrafi/
