Tashmë duket se nuk ka më asnjë pengesë ligjore. Ditën e sotme, Këshilli i Bashkisë Vau Dejës ka miratuar projekt- vendimin për investimin që ky institucion do të bëjë në fushën sportive të Bushatit, ku ushtron aktivitetin e tij klubi i Basanias.
Me të gjitha votat pro, këshilltarët e pranishëm i kanë hapur rrugë këtij investimi që do të bëhet në bashkëpunim me Federatën Shqiptare të Futbollit dhe kap vlerën e 360 milionë lekëve të vjetra. Gjysma e këtij investimi do të bëhet nga institucioni i futbollit shqiptar, ndërsa gjysma tjetër nga Bashkia Vau Dejës, që do ta lëvrojë shumën e saj në tre vite.
Pas akordit të arritur në mes kryebashkiakut Kristian Shkreli dhe zëvendëspresidentit të FSHF Arben Dervishaj, është dashur që Bashkia të ndjekë të gjitha procedurat ligjore për këtë investim. Pak ditë më parë është zgjidhur edhe dëgjesa publike me komunitetin dhe patjetër që pjestarët e tij janë shprehur pro këtij investimi që do t’i japë edhe më shumë gjallëri jetës sportive në këtë Bashki.
Ajo që ka mbetur për t’u realizuar tashmë është vetëm miratimi edhe në Komitetin Ekzekutiv të FSHF (që pritet të bëhet muajin e ardhshëm) dhe më pas firmosja e kontratës në mes dy palëve dhe nisja e punimeve. Po shpresohet shumë që gjithçka të marrë udhë brenda muajit shtator dhe punimet pritet të zgjasin dy muaj. Kujtojmë që fusha ku stërvitet dhe i luan ndeshjet Basania, do të shtrohet me tapet sintetik.(shkodrasport.com)
