Gianluigi Donnarumma nuk është thirrur nga PSG për Superkupën e Europës kundër Tottenham, gjë që ka habitur jo pak botën e futbollit. Ish-shoku i tij te Milani, Christian Abbiati, tha për “Gazzetta dello Sport”: “Nëse ka ndodhur diçka, që ne nuk e dimë, atëherë janë punët e tyre. Përndryshe, është një gjë e çmendur, pa shpjegim logjik sportiv”.
Abbiati kujtoi se Donnarumma ka qenë vendimtar për sukseset e PSG-së: “Ju thoni që i ka dhuruar gjysmën e Champions-it, unë them edhe më shumë… Mund të ketë të tjerë më të mirë me topin në këmbë, por të ndërroni një portier që të ka sjellë në vitrinë një Champions…”
Për ish-portierin kuqezi, arsyeja e lënies jashtë është e pakuptueshme: “Në Europë ka bërë pritje të pabesueshme, ndërhyrje që pak do t’i bënin. Një portier i nivelit të tij do të gjejë patjetër klub tjetër të madh. Është mëkat ta ndërpresë kështu një cikël. I uroj zgjidhjen më të mirë, sepse e meriton”.
