Mbrojtësi francez Mahamadou Dembele, kapiteni i KF Tiranës, është futur në radarin e klubit azer Karabaku, një prej ekipeve më të suksesshme në rajon dhe pjesëmarrës i rregullt në kupat e Europës.
Lajmi bëhet i ditur nga faqja e specializuar “433inFoot”, e cila raporton për interesimin serioz të kampionëve të Azerbajxhanit për shërbimet e qendërmbrojtësit bardheblu. Dembele, i cili ka mbërritur te Tirana si një përforcim i rëndësishëm për repartin defensiv, është kthyer shpejt në lider të padiskutueshëm të skuadrës.
Me eksperiencë ndërkombëtare dhe një prezencë të fortë fizike në fushë, ai jo vetëm ka garantuar stabilitet prapa, por ka fituar edhe besimin e stafit teknik dhe shokëve të skuadrës, duke marrë shiritin e kapitenit. Forma e tij e qëndrueshme, leximi i saktë i lojës dhe aftësia për të organizuar mbrojtjen kanë bërë që Dembele të jetë një pikë referimi për Tiranën.
Këto cilësi duket se kanë tërhequr vëmendjen e Karabakut, i cili njihet për ambiciet e mëdha dhe objektivat e vazhdueshëm në arenën europiane. Klubi nga Baku, që ka fituar disa herë radhazi titullin kampion, e sheh mbrojtësin francez si një përforcim potencial për të rritur konkurrencën në prapavijë. Për momentin, asnjëra palë nuk ka bërë një koment zyrtar mbi këtë interesim, por burimet pranë merkatos sugjerojnë se një ofertë konkrete mund të materializohet në javët e ardhshme, sidomos nëse Karabaku vendos të shfrytëzojë fazën e fundit të merkatos verore.
Në kryeqytet, tifozët bardheblu shpresojnë që kapiteni të vazhdojë të mbetet pjesë e skuadrës, pasi roli i tij në balancën dhe moralin e ekipit është i madh. Megjithatë, një transferim i mundshëm drejt një klubi me emër dhe pjesëmarrës të rregullt në Europë do të ishte një hap i rëndësishëm edhe për karrierën e vetë lojtarit. Se çfarë do të ndodhë, do të vendoset nga negociatat dhe vullneti i palëve, por një gjë është e sigurt. Mahamadu Dembele është një emër që ka fituar vëmendjen e merkatos ndërkombëtare dhe Karabaku është gati të bëjë lëvizjen e parë.
Performanca
Që prej mbërritjes te Tirana në merkaton e verës së vitit 2024, Dembele ka qenë një figurë kyçe në mbrojtje dhe një lider shoqëror në fushë. Aktiv në 36 ndeshje për Tiranën, me 1 gol të shënuar, duke kaluar gjithsej 3 126 minuta në fushë. Në Ligën e Konferencës, ka luajtur 2 ndeshje, me një kohë totale prej 22 minutash (mesatarisht 11 minuta për ndeshje), pa gola, asistime apo kartonë. Këto statistika dëshmojnë jo vetëm që Dembele është titullar i palëkundur, por edhe se ka një ndikim të madh në rendimentin defensiv, duke mbajtur një pozitë kyçe dhe duke siguruar stabilitet gjatë gjithë sezonit. Arabia Saudite është një tjetër horizont interesant financiarisht, që mund të shënojë kulmin e karrierës për mbrojtësin francez.
