Ish-futbollisti i njohur Redi Jupi thekson se situatat e tolerimeve në ndeshje nga skuadra të veçanta kanë ndikuar ndjeshëm në renditjen e kampionatit shqiptar, dhe se duhet gjetur një zgjidhje sa më shpejt. Në emisionin “Procesi Sportiv”, ish-kapiteni i Dinamos përmendi pikërisht blutë si një nga skuadrat që kanë toleruar, duke ndikuar jo vetëm në renditjen e tyre, por edhe në atë të ekipeve të tjera.
“Katër skuadrat e para nuk kanë pasur surpriza deri në një moment të caktuar, por më pas Elbasani u fut në garë dhe u kthye në një rrezik serioz për Partizanin. Më shumë për shkak të demeritave të Partizanit, sesa për ndonjë rritje të jashtëzakonshme të Elbasanit, megjithatë duhet theksuar se Elbasani bëri një kampionat dinjitoz dhe ngriti ndjeshëm nivelin e tij. Gjithsesi, fitorja e fundit e Partizanit në ndeshjen direkte zgjidhi shumë nga polemikat e mundshme dhe vulosi me meritë kualifikimin e tij në katërshen më të mirë të sezonit,” tha Jupi.
Sa i përket situatës së Tiranës, Jupi u shpreh: “Tirana do të luajë ‘play-out’-in ndaj Pogradecit, që surprizoi duke mundur Besën 1-0, ndonëse Besa kishte një ekip shumë të mirë. Një ndeshje teke direkte nuk është e lehtë, sidomos për një skuadër si Tirana që vjen me ngarkesë të madhe psikologjike dhe lodhje fizike. Ndërkohë, Pogradeci është në ngritje dhe hyn në ndeshje me një moral pozitiv. Shpresojmë të shohim një ndeshje të ndershme dhe të luftuar, pa ndërhyrje, pasi në javët e fundit kanë shpërthyer polemikat.”
Në lidhje me akuzat për trukime, Jupi nënvizoi: “Akuzat e Laçit dhe paralajmërimet që kemi dhënë për ndeshjen Dinamo–Skënderbeu janë të gjitha indicie të qarta. Nëse ka vullnet, kjo situatë mund dhe duhet të zgjidhet. Fenomeni i trukimeve është një kërcënim serioz që i prek në rrënjë themelet e futbollit. Nuk ka gjë më shkatërrimtare sesa paracaktimi i rezultateve, qoftë përmes tolerimeve apo trukimeve. Kur kemi prova konkrete dhe deklarata të forta nga protagonistët e garës, atëherë kambanat e alarmit nuk mund të injorohen.”
