Nga Endri ÇINARI
Emra të shumtë të folur në ditë dhe javët e fundit që mund t’i afrohen Vllaznisë, por për momentin duket se merkato e kuqebluve është në “pit stop”. Tek 9 herë kampionët e vendit po mungojnë lëvizjet konkrete në periudhën e fundit, në një moment ku u mendua se skuadra do kompletohej para nisjes së fazës përgatitore verore në Slloveni. Futbollisti i fundit i zyrtarizuar në rradhët e kuqebluve ishte Artan Jazxhi.
Me mbrojtësin që u prezantua zyrtarisht të shtunën e kaluar, pas ndeshjes miqësore kundër Vllaznia Elite, pavarësisht se kishte më shumë se 10 ditë që stërvitej me kuqeblutë. E tashmë kur po mbyllet thuajse java dhe po bëhen përgatitjet e fundit për nisjen e fazës përgatitore, lëvizjet konkrete dhe zyrtarizimet e afrimeve kanë munguar në rradhët e shkodranëve të drejtuar nga Martini.
Pavarësisht se emra si Adili, Nasr, Kallaku kanë qarkulluar shumë dhe shpesh në ambientin e futbollit kuqeblu, asgjë konkrete nuk ka ndodhur. Jo vetëm me futbollistët e sipër përmendur, por edhe me ndonjë emër surprizë që mund të jetë pjesë e Vllaznisë në sezonin e ri.
Një merkato e “stopuar” për momentin, që patjetër nuk do qëndrojë për shumë kohë e tillë pasi nën kampionët e vendit janë ende në kërkim të vazhdueshëm të futbollistëve cilësor sidomos në mesfushë dhe sulm për të kompletuar skuadrën për edicionin e ri.(www.shkodrasport.com)
