Nga Maringlen ZHIVANI
Trajneri i Ilirisë së Fushë-Krujës, Dritan Smajli ka folur për mediat pas miqësores me Tiranën, që u mbyll në barazim 1-1. Ai tha se në duelin me kryeqytetasit, ekipi i tij zhvilloi një ndeshje pothuajse perfekte.
“Besoj që ndeshja me Tiranën, në një përqindje të madhe, tregoi forcën reale që ne kemi. Kjo miqësore na shërbeu më shumë për të parë kondicionin fizik. Mendoj se djemtë interpretuan gati-gati një ndeshje perfekte dhe gjëja më pozitive ishte se treguan punën që ne kemi bërë në stërvitje. Ekipi tashmë është i plotë dhe nuk besoj të ndërhyjmë më në merkato, pasi të gjitha repartet janë të plotësuara. Gjithsesi, “kurrë mos thuaj kurrë”.
Iliria, për të qenë e gatshme për kampionatin e ri, do të kryejë edhe disa teste miqësore deri në startin e ndeshjes së parë të kampionatit. Kjo do të na shërbejë shumë për konsolidimin e grupit, pasi futbollistët e rinj të afruar gjatë merkatos kërkojnë akoma më shumë kohë për t’u ambientuar me rolet dhe punën e grupit të skuadrës.
Po ashtu, edhe në aspektin fizik të tyre, sepse shkaku që i janë bashkuar vonë skuadrës kërkon një kohë edhe më të gjatë për përshtatjen e tyre. Gjithmonë ne do të qëndrojmë me këmbë në tokë”,-tha trajneri lezhjan i Ilirisë së Fushë-Krujës, Dritan Smajli.(www.shkodrasport.com)
