Bernard Berisha i ka dhënë fund aventurës së tij tetëvjeçare në futbollin rus, ku ka bërë emër me lojën dhe me golat e tij në radhët e Ahmat Grozni.
Mesfushori kosovar, i cili shkëlqeu te Skënderbeu para se të niste aventurën në Rusi, tashmë raportohet se është pranë kthimit “në shtëpi”.
Sipas “Tëvë1” në Kosovë, 33-vjeçari është tashmë pranë kthimit në kampionatin kosovar, nga i cili është larguar në vitin e largët 2012 për të provuar kampionatin shqiptar ku fillimisht luajti me fanellën e Besës së Kavajës.
Berisha raportohet se ka gjetur akordin me klubin e Ballkanit, për t’iu bashkuar skuadrës që drejtohet nga një emër që ai e njeh mirë, Orges Shehin, me të cilin ka qenë bashkëlojtar në vitet e tij të suksesshme në radhët e Skënderbeut.
