Bylis mori një fitore dramatike në minutën e fundit duke mposhtur minimalisht Dinamon në shtëpi. Goli i Bruno de Souza në sekondën e fundit i dha 3 pikët e para ballshiotëve. Në përfundim të sfidës trajneri Emmanuel Egbo dha prononcimin e tij për RTSH Sport.
“E rëndësishme është fitorja dhe 3 pikët. Fituam siç humbëm në ndeshjen e parë. Krijuam raste dhe arritëm të shënonim. Kjo fitore vlen shumë për ne pasi është ndeshja e parë në shtëpi.
Kemi pak vështirësi në majën e sulmit, Gjata është i vetmi qendërsulmues dhe duhet të bëj vetëm adaptime. Nuk e hoqa dot, ai është i vetmi bomber shqiptar në kampionat.
Kemi shumë punë për të bërë që të krijojmë raste. Për të shkuar përpara duhet improvizim dhe aftësi individuale. Vazhdojmë të punojmë pasi gjë e mirë është që krijojmë raste.
Duhet ta harrojmë ndeshjen me Teutën, luajtëm mirë, por humbëm. Kjo ndeshje është plus nga ana psikologjike për ekipin”, tha Egbo.
