Ndërkohë që e gjithë vëmendja në Kontinasa është përqendruar te mbërritja e bujshme e Xhonatan Dejvid, nga Portugalia vijnë zhvillime të rëndësishme që lidhen me të ardhmen e Fransisko Konseisao.
Sipas asaj që raporton gazeta portugeze “A Bola”, klubi i Portos është i gatshëm të ulë çmimin për kartonin e sulmuesit të ri, duke e bërë më të realizueshëm qëndrimin e tij përfundimtar te Juventusi. Bëhet fjalë për një zbritje modeste, nga 30 në 28 milionë euro, por gjithsesi mjaftueshëm për të treguar një hapje të qartë nga ana e portugezëve për të negociuar.
Një sinjal pozitiv që Juventusi mund ta shfrytëzojë për të mbyllur sa më shpejt dhe në mënyrë përfundimtare marrëveshjen për talentin portugez të vitlindjes 2002, i cili ka treguar shkëndija premtuese gjatë kohës së tij në Torino. Një marrëveshje e tillë nuk do të ishte thjesht një investim për të ardhmen, por edhe një lëvizje strategjike në dritën e zhvillimeve të tjera brenda skuadrës.
Sipas “Tuttosport”, trajneri Igor Tudor ka dhënë sinjale të qarta se nuk e ka në planet e tij argjentinasin Niko Gonzalez, i cili tanimë është në listën e lojtarëve në dalje. Në këtë kontekst, sigurimi i Konseisaos do të shërbente si një zgjidhje ideale për të mbuluar hapësirën që mund të lërë largimi i Gonzalezit, si në aspektin ofensiv ashtu edhe në atë taktik. Për momentin, palët janë ende në bisedime, por optimizmi rritet dita-ditës.
