Një qendërsulmues senegalez ka firmosur te Vllaznia. Lajmi konfirmohet nga burime të “Shkodra Sport” pranë klubit kuqeblu. Nga sa mësohet, 26-vjeçari Matar Dieye është afrimi i rradhës te shkodranët dhe tashmë mbetet vetëm zyrtarizimi nga ana e klubit te Vllaznia, pasi është firmosur edhe kontrata, e cila nga sa mësohet do të jetë një-vjeçare.
Qendërsulmuesi vjen pas aktivizimit te klubi i Bellinzona në Zvicër, teksa sezonin e kaluar, ai ka luajtur në 16-javë. Dieye është aktivizuar si titullar në 5-ndeshje dhe në 11-të tjera ka hyrë në lojë si zëvendësues, duke marrë 497-minuta në fushë, teksa ka arritur të shënojë edhe një gol me Bellinzonen.
Ndërkohë që, më parë sulmuesi senegalez ka luajtur edhe për ekipe si Kups në Finlandë, Debrecenin në Hungari, Goricën në Kroaci, Olimpik Donetsk në Ukrainë dhe Karapaty Liev. Dieye ka luajtur edhe në Maltë, ndërsa karrierën e tij e ka filluar në Itali me Viçenzan në Serinë B. Dieye është një futbollist shtatlartë, 1.91-metra i gjatë, që mund t’i bëjë punë Vllaznisë dhe mbi të gjitha, të jetë një alternativë e kapitenit Bekim Balaj në qendër të sulmit.
Vlera e tij në treg, sipas faqes së specializuar “Transfermarkt” është momentalisht 150-mijë euro, ndërsa kulmi i tij ka qenë te Gorica, ku kartoni i tij ka shkuar edhe 700-mijë euro. Tashmë, mbetet për t’u parë se si do të shkojë kjo aventurë e re e tij me klubin e Vllaznisë.
Maringlen ZHIVANI
