Karl-Hainc Rumenige (69) dhe Uli Hënes (73) e shndërruan Bajernin e Mynihut në një nga klubet më të mëdha në botë. Ai ka qenë anëtar i bordit mbikëqyrës të klubit të Mynihut që nga viti 2023.
Në një intervistë me “WELT AM SONNTAG”, Rumenige ka folur për problemet e pagave të Bajernit, për modelin PSG dhe ka kritikuar trajnerin e kombëtares gjermane, Julian Nagelsman (37).
Tema e parë e prekur ka qenë ajo e shpenzimeve. “Problemi i madh janë pagat e larta, edhe Bajerni po e ndjen këtë. Kur bëhet fjalë për pagat e lojtarëve tanë, ne kemi qenë disi bujarë – duhet të jemi autokritikë për këtë”. Rekordmenët e titujve në Gjermani po planifikojnë një listë të re lojtarësh: 14 deri në 16 lojtarë do të fitojnë një pagë “shumë të mirë”, ndërsa katër deri në gjashtë do të fitojnë një pagë më të ulët. Pjesa tjetër e skuadrës do të përbëhet nga talente të reja.
Modeli i Rumeniges është fituesi i Ligës së Kampionëve, PSG-ja, e cila ka ulur strukturën e pagave pas largimit të superyjeve të saj si Mesi, Nejmar, Serxhio Ramos e disa të tjerë. “Siç mund ta shihni te PSG-ja, mund të keni sukses të madh edhe duke ndryshuar sistemin”. Rumenige ka vlerësuar ish-trajnerin e Holandës dhe Bajernit ndër të tjera, Luis van Gal (73), i cili refuzoi transferimet e shtrenjta, duke thënë: “Nuk keni nevojë të blini, ne i kemi vetë në klub”. Në atë kohë, u shfaqën në Mynih lojtarë si Myler, Badshtuber dhe Alaba.
Rumenige ka folur dhe për ekipin kombëtar të Gjermanisë dhe trajnerin Julian Nagelsman, i cili kishte folur tashmë për titullin e Kupës së Botës. “Julian Nagelsman i sjell shumë energji dhe bindje rolit të tij – kjo është thelbësisht pozitive. Por ndonjëherë sjellja e tij duket pothuajse paksa shumë kërkuese dhe ekstroverte.” Rumenige e kritikon Nagelsmanin: “Mendoj se mund të jetë e dobishme të ushtrohet pak më shumë vetëpërmbajtje. Gjermania ka qenë gjithmonë veçanërisht e suksesshme kur nuk e ka shpallur veten domosdoshmërisht favorite, por përkundrazi ka hyrë në turne me një dozë modestie. Ndoshta do të ishte e mençur ta mbanim mend këtë. Detyra e Julian Nagelsmanit është ta zhvillojë më tej ekipin”.
Ai nuk e sheh klubin e tij si fajtor për dështimin e transferimit të Florian Virc. “Ne i dhamë gjithçka. Në këtë rast, askush nuk bëri gabim. Është vendimi i Florianit – dhe ne duhet ta pranojmë atë”. Sipas ish-shefit të Bajernit, lojtarët aktualë të ekipit duhet ta shfrytëzojnë këtë mundësi për të treguar se mund të mbajnë mbi supe një fanellë të rëndë si ajo e bavarezëve.
