Barcelona ka zyrtarizuar të mërkurën rinovimin e kontratës me trajnerin Hansi Flick, i cili do të qëndrojë në krye të ekipit deri në qershor të vitit 2027.
Kontrata e mëparshme e teknikut gjerman ishte e vlefshme deri në vitin 2026, por drejtuesit e klubit vendosën t’i ofrojnë një zgjatje pas një sezoni të shkëlqyer debutues.
Flick e udhëhoqi Barcelonën drejt një triplete vendase këtë sezon, duke fituar La Ligan, Kupën e Mbretit dhe Superkupën e Spanjës në vitin e tij të parë si trajner i katalunasve.
Ky rinovim vjen si një sinjal besimi nga ana e klubit katalanas ndaj trajnerit gjerman dhe projektit që ai ka nisur të ndërtojë me ekipin.
Hansi Flick, pas zyrtarizimit të marrëveshjes, u shpreh i kënaqur me progresin e skuadrës dhe atmosferën pozitive në dhomën e zhveshjes.
“Jam krenar për përkushtimin dhe shpirtin që kanë treguar lojtarët këtë sezon. Është kënaqësi të punosh në një ambient kaq të motivuar”, tha Flick.
Barcelona synon të vazhdojë ndërtimin e një skuadre konkurruese në nivel evropian, dhe Flick shihet si njeriu i duhur për ta udhëhequr këtë proces. /Telegrafi/
