Vetëm 320 ditë kanë kaluar nga dita kur Raúl Asencio zhvilloi stërvitjen e parë me ekipin e parë të Real Madridit nën urdhrat e Carlo Ancelotti-t, deri te rikthimi i tij në SHBA për të marrë pjesë në Kupën e Botës për Klube. Në këtë periudhë të shkurtër, qendërmbrojtësi spanjoll ka përjetuar një ngjitje të rrufeshme, duke kaluar nga një lojtar thuajse anonim me vlerë tregu 300 mijë euro, në një talent të konsoliduar që sot vlerësohet 40 milionë.
Gjithçka nisi me grumbullimin veror të vitit të kaluar në “Soccer Champions Tour”, ku Asencio u thirr për të mbushur boshllëqet e krijuara nga dëmtimet në mbrojtje. Ai përfitoi maksimalisht nga kjo mundësi: debutoi kundër Milanit me 45 minuta, luajti edhe ndaj Chelsea-t dhe bindja e stafit teknik për aftësitë e tij ishte e menjëhershme. Rezultati? Një rinovim deri në vitin 2031, rritje page dhe një klauzolë largimi astronomike prej 1 miliard eurosh.
Pavarësisht ofertave të shumta nga Spanja dhe Europa, drejtuesit e Real Madridit nuk e morën kurrë në konsideratë largimin ose huazimin e Asencio-s. Ata ishin të bindur se kishin në dorë një talent të rrallë, edhe pse ai nuk kishte pasur shumë minuta në ekipin e parë. Tani, pas 42 ndeshjesh dhe mbi 3.000 minuta të luajtura në fanellën e bardhë, Asencio është një emër i rëndësishëm në planet e trajnerit Xabi Alonso.
