Shkruar nga Endri ÇINARI
Vllaznia duket se po futet gradualisht në rrugën e duhur, pas fitores 2-0 ndaj Tiranës në javën e tetë të kampionatit. Suksesi në klasiken e futbollit shqiptar ka rikthyer disi qetësinë në radhët e kuqebluve, të cilët e kishin nisur sezonin në mënyrë negative dhe tashmë kërkojnë të ndërtojnë mbi këtë rezultat pozitiv.
Megjithatë, për shkodranët nuk ka kohë për të festuar gjatë, pasi kalendari i ngjeshur i kampionatit i kërkon skuadrës të kthejë menjëherë vëmendjen te sfida e radhës. Në mesjavë, Vllaznia do të luajë në transfertë ndaj Vorës, në një përballje që i përket javës së nëntë të Superiores dhe që do të mbyllë fazën e parë të kampionatit.
Pikërisht për këtë arsye, stafi teknik i drejtuar nga Csaba Laszlo ka vendosur të mos humbasë kohë në përgatitjet për këtë takim. Edhe pse ndeshja me Tiranën u zhvillua të shtunën, kur pritej që futbollistët të përfitonin një ditë pushimi të dielën, planet kanë qenë të ndryshme.
Kështu, kuqeblutë kanë zbritur sërish në fushën e stadiumit “Loro Boriçi” ditën e diel, duke zhvilluar një seancë stërvitore pas suksesit në klasike. Natyrisht, duke marrë parasysh ngarkesën fizike të ndeshjes së fundit dhe ritmin e lartë të kalendarit, puna nuk ka qenë e përqendruar te intensiteti maksimal, por më tepër te rikuperimi dhe çlodhja e muskujve.
Në këtë mënyrë, Laszlo synon të menaxhojë sa më mirë gjendjen fizike të futbollistëve të tij, duke i mbajtur të gjithë të përqendruar dhe të gatshëm për sfidën e radhës. Fitorja ndaj Tiranës ka dhënë sinjale pozitive, por trajneri hungarez e di se skuadra ka ende shumë për të përmirësuar dhe se vazhdimësia e rezultateve mbetet thelbësore.
Tashmë, Vllaznisë i mbeten edhe dy ditë përgatitje, të hënën dhe të martën, përpara transfertës ndaj Vorës. Objektivi i shkodranëve është i qartë: të shfrytëzojnë momentin pozitiv të krijuar nga suksesi në klasike dhe ta mbyllin fazën e parë me një tjetër rezultat të mirë, që do t’i ndihmonte të fitonin më shumë besim për vazhdimësinë e sezonit.
Burimi: Gazeta “Shkodra Sport”
