Agim Ibraimi do të vazhdojë karrierën e tij në Kategorinë Superiore. Ashtu siç pritej, sulmuesi i cili i dha lamtumirën Kukësit duke mos rinovuar me klubin verilindor, ka zgjedhur që të bëhet pjesë e një tjetër klubi në elitën e futbollit shqiptar.
Pak orë pasi u zyrtarizua “divorci” i tij me Kukësin, u bë zyrtare edhe firma e sulmuesit me klubin e Dinamos, me të cilin kishte qenë në bisedime prej disa javësh.
Ka qenë vetë skuadra kryeqytetase ajo që ka bërë të ditur për nënshkrimin e një akordi mes palëve dhe se që nga dita e nesërme ai do të vihej nën urdhrat e Bledi Shkëmbit në përgatitjet për sezonin e ri.
“Futboll Klub Dinamo zyrtarizon afrimin e radhës, Agim Ibraimi.
Mesfushori 32-vjeçar me një karrierë të pasur jashtë vendit dhe së fundmi një eksperiencë në Superiore, bashkohet nesër me skuadrën për t’u vënë nën urdhrat e trajnerit Shkëmbi”, shkruhej në njoftimin në rrjetet sociale të bluve që po shtonë radhët e tyre me elementë shumë cilësorë duke bërë të qartë se do të nisin edicionin me synime madhore.
