Tre arbitra shqiptarë do të arbitrojnë për herë të parë në fazën e tretë kualifikuese (me formatin aktual) të Ligës së Europës.
“Xhaketat e zeza” janë graduar nga UEFA, duke marrë besim për një takim ku në fushë do të jetë një skuadër me emër dhe traditë në futbollin europian si Sevija.
Kryesori Enea Jorgji i asistuar nga ndërkombëtarët Rejdi Avdo dhe Ridigerd Çokaj do të vendosin drejtësi në ndeshjen e kthimit mes skuadrës spanjolle dhe Zalgiris Vilnius.
Për gjyqtarët shqiptarë, vlerësimi është i lartë që do të arbitrojnë një sfidë të tillë delikate, duke ditur që edhe takimi i parë ka përfunduar me fitore minimale 1-0.
Kjo treshe e gjyqtarëve shqiptarë me stemën e FIFA-s, po ngjitet në hierarki sa u përket tureve kualifikuese të arbitruara, duke regjistruar një hap cilësor.
