Pakkush kishte dyshime që Fernando Torres do të kthehej përsëri te Atletiko Madrid, klubin që ka qenë gjithmonë shtëpia e tij.
Por këtë herë, ish-sulmuesi spanjoll nuk do të kthehet si një lojtar i cili bëri të ëndërronte tifozët e kësaj skuadre me golat, e tij, por si një trajner që do të përgatitë talentet e të ardhmes.
Torres, pasi vari këpucët në gozhdë duke luajtur në Japoni me Sagan Tosu, tashmë ka vendosur që të bëhet trajner dhe në edicionin e kaluar, kishte qenë shpesh në klubin e Atletikos për të mësuar jetën e përditshme në futbollin e të rinjve. Por “mësimi” ka marrë fund dhe sot klubi ka zyrtarizuar kthimin e “El Nino”.
Tashmë ai do të mbajë postin e trajnerit të ekipit Juvenil A të Atletiko Madrid dhe nga ai do të nisë rrugëtimin e tij për t’u bërë trajner, me tifozët e Atletikos që janë të bindur se herët a vonë, do të jetë ai që do të ulet në pankinën e “los colchoneros’ dhe do t’i bëjë të ëndërrojnë përsëri.
