Tomas Brdariç mendon se dy duelet ndaj Labërisë kanë qenë një sfidë më vete për skuadrën që drejton. Në prononcimin pas ndeshjes, trajneri i Vllaznisë theksoi se ekipi ia doli në kushte të vështira duke iu referuar terrenit në “Reshit Rusi”.
“Dy ndeshjet me Labërinë ishin një sfidë shumë e madhe. Duhet të kuptojmë që nuk duhet të nënvlerësojmë askënd. Sot (dje) ishim mjaft të përqendruar dhe bëmë një ndeshje të mirë. Këtë herë nuk ishte vetëm problemi i kundërshtarit, por edhe i fushës.
Kjo ishte një sfidë më vete, kështu që jam krenar për djemtë dhe fitoren. Të mbrosh në këtë lloj fushe është më e lehtë sesa të krijosh një futboll të shpejtë dhe sulmues. Mund të kishim shënuar ndoshta edhe 6-7 gola, por ndeshja mbaroi 4-0 dhe duhet të jemi të kënaqur me këtë rezultat”, ka thënë fillimisht Brdariç.
I pyetur nëse kjo ndeshje i vlejti në prag të takimit me Dinamon, ai u shpreh: “Jemi profesionistë, tani do të përqendrohemi patjetër te ndeshja me Dinamon.
Është mjaft e rëndësishme që u kualifikuam, pasi çdo ndeshje është e vështirë dhe ndryshon nga njëra-tjetra. Do të luajmë me Dinamon në stadiumin tonë dhe është një tjetër histori. Do të kemi kushte më të mira dhe do të japim gjithçka për fitoren”.
