Rikthehet Kategoria Superiore dhe të gjitha ndeshjet e javës së tretë luhen ditën e shtunë. Teuta pret Kukësin në “Niko Dovana” nesër (16:45), sfidë që djemtë e Edi Martinit duan ta fitojnë.
Trajneri i ekipit durrsak, foli në prononcimin e dhënë për mediat rreth kësaj përballje, gjendjes së ekipit të tij, kundërshtarëve dhe objektivave të Teutës.
“Në ndeshjen me Skënderbeun humbëm shumë raste dhe më pas u bëmë nervozë, nuk është se e nënvlerësuam ekipin kundërshtar. Është kaluar ajo ndeshje, bëmë një ndeshje shumë të mirë më pas me Tiranën.
Kukësi? E njohim mirë, edhe pse ka ndryshuar shumë. Është një ekip mjaft i mirë dhe cilësor, kanë një trajner të mirë dhe e dimë që do jetë një ndeshje tepër e vështirë. Gjithsesi, e dimë se çfarë duhet të bëjmë.
Ne kemi grupin kryesor, klubi është i pari, individi vjen më pas. Lojtarët duhet të japin maksimumin për aq minuta do të futen në fushë. Dëshira e çdonjërit është të luajë, trajneri duhet ta kuptojë një gjë të tillë.
Karabeci-Daja? Nuk dua të flas me emra, parësor është ekipi. Për mua të gjithë lojtarët janë njësoj. Ata që do të bëjnë më mirë gjatë javës do të jenë në lojë.
Të dy janë lojtarë mjaft të nevojshëm për ekipin, gjithsesi, për momentin, ne kemi një ekip mjaft të mirë. Dy qendrat e mesfushës, si Aleksi dhe Avdyli, po bëjnë mjaft mirë.
Kampionati? Ne do të luajmë futbollin që dimë të bëjmë dhe do të japim maksimumin në çdo ndeshje. Ne jemi të qartë dhe e dimë shumë mirë se çfarë force kemi, kush jemi dhe çfarë do bëjmë.
Kemi një dëmtim të Emiljano Vilës, i cili nuk u stërvit dje dhe pardje me ekipin. Duke njohur karakterin dhe grintën që ai ka, besoj se do të jetë në fushë nesër. Edhe nëse nuk do të jetë, kemi mjaft lojtarë të tjerë“, deklaron trajneri shkodran. /abcnews/
