Egnatia ka dhënë një tjetër sinjal se tashmë po “zgjohet” në rrugën drejt titullit duke marrë një fitore shumë të rëndësishme përballë një kundërshtari direkt si Dinamo.
Rrogozhinasit kanë treguar ndryshe nga herët e tjera një lojë më pak dominuese, por më cinike përballë ekipit të drejtuar nga Ilir Daja, teksa kanë shfrytëzuar maksimalisht rastet që iu shfaqën, duke shënuar në secilën pjesë loje me Albanezen.
Kurse dinamovitët nga ana tjetër krijuan më shumë raste, por ishin të pasaktë para portës, të ndalur nga Dajsinani në një formë spektakolare që u mohoi golin emrave si Bregu, Nani e Vila. Në fund, në minutat shtesë, erdhi goli i Qefaliajt, i cili shërbeu vetëm për statistika pasi vulosi suksesin 2-1 të Egnatias.
DINAMO-EGNATIA 1-2
90’+2′ Qefalija / 5′, 58′ Albaneze
