Vllaznia nuk ka të madh vetëm emrin dhe historinë. Kjo skuadër dhe ky klub dallohet për shumë gjëra, mbi të gjitha për tifozët e saj të mrekullueshëm, të cilët janë të veçantë dhe e mbështesin fuqimisht atë.
Padyshim që, njëri prej tyre është Gëzim Çoçja, një sportdashës i Vllaznisë, i cili ka qenë në stadium thuajse në çdo ndeshje ndër vite.
I ftuar në emisionin “Sport Arena” në TV Rozafa, Çoçja u shpreh se tifozët e Vllaznisë janë larguar edhe nga arbitrimi shumë zhgënjyes ndaj shkodranëve këtë sezon, por thekson se ai beson shumë që ndeshjen e Kupës ndaj Partizanit, tifozët shkodranë do ta mbështesin ekipin e tyre të zemrës maksimalisht, duke mbushur shkallët e stadiumit “Loro Boriçi”.
“Unë jam me atë parullën “Vllazni, ti nuk je kurrë vetëm” dhe një prej atyre jam unë domethënë që nuk shkëputem. Gjithmonë, Vllaznia i ka tërhequr tifozët, por në këto momentet e fundit, duke u ndëshkuar edhe nga arbitrimi, me të vërtetë shumë zhgënjyes, edhe janë larguar, por besoj që këtë rradhë me Partizanin, edhe nga kjo studio do u bëj thirrje që të mos mungojnë, t’i mbushim shkallët e stadiumit dhe ta mbështesim ekipin deri në fund.
Jemi prapë brenda objektivave. Në qoftë se, dalim në finalen e Kupës së Shqipërisë, është një sukses për ekipin tonë.
Tani, edhe ndryshimi i trajnerit, nganjëherë ndikon super mirë, por nganjëherë rri edhe në vend-numëro. Si në rastin tonë, domethënë që, nuk morëm atë që pritëm.
Shumë faktorë janë për situatën aktuale të Vllaznisë, por në fund trajnerit Plori i shikohet rezultati. Trajneri thuhet se matet me rezultate”,-tha gjatë prononcimit të tij, sportdashësi i Vllaznisë, Gëzim Çoçja,
Maringlen ZHIVANI
