Tre ekipet Kombëtare të Shqipërisë kanë në përbërje 9 futbollistë shkodranë që luajnë me Vllazninë por edhe me skuadra të tjera brenda e jashtë vendit. Ditët e fundit në listën zyrtare në Kombëtares U-17 është përzgjedhur i vetmi nga Shkodra e zona e veriut 15 vjeçari Arlind Kalaja për eleminatoret e “Euro 2012” që kjo skuadër do të zhvillojë. Pas grumbullimit dyjavor në Durrës 17 vjeçarët do të nisen ditën e marte drejt Estonisë dhe më pas me 13 tetor do të luajnë sfidën e parë me Sllovakinë. Në grup janë Shqipëria, Gjermania, Estonia dhe Sllovakia. Shkodrani Kalaja është pjesë e ekipit U-17 të Vllaznisë dhe shihet si një futbollist me të ardhme ndaj është përzgjedhur edhe nga trajneri Mustedanagiç. Ndryshe nga U-17, tek 21 vjeçarët edhe kësaj here janë grumbulluar 5 futbollistë shkodran për takimet e radhës. Ndër të tjerë trajneri Artan Bushati ka përzgjedhur Armando Vajushin që luan me Vllazninë, Antonio Markun e Dinamos, Alis Bocin e Luftëtarit, Erjon Vucaj që është pjesë e Laçit dhe Bekim Balën e Tiranës. Të pesë këta lojtarë janë pjesë e rëndësishme e ekipit Shpresa dhe gjithnjë janë aktivizuar rregullisht nga trajneri Bushati në takimet zyrtare të eleminatore të europianit. Ndërkohë që edhe Kombëtarja e madhe nuk mbetet pa futbollistë nga Shkodra. Aty janë të grumbulluar 3 lojtarë. Bëhet fjalë për dy të zakonshmit Admir Teli që luan në Azerbajxhan dhe Hamdi Salihin që aktivizohet me Rapidin e Vienës në Austri. Vijojnë të jenë në formë të mirë sportive dhe të kenë preferencën e trajnerit Kuzhe edhe për një sfidën e luksit që zhvillohet të premten me Francën. Risia tek kombëtarja e Kuzhe është grumbullimi i shkodranit Arsen Sykaj për takimet e radhës. Mbrojtësi që ka fituar bindshëm vendin e titullarit tek Vllaznia duket se ka fituar edhe besimin e kroatit Kuzhe që i ka bërë një vend mes më të mirëve të Shqipërisë. Në këtë mënyre Shkodra vijon të ruajë traditën e saj dhe të jetë një pikë e rëndësishme për furnizimin me futbollistë cilësor në ekipet Kombëtare.
Futbollistët shkodran të grumbulluar me ekipet Kombëtare:
U-17
Arlind Kalaja (Vllaznia)
U-19
Bekim Demaj (Vllaznia)
Amir Tafa (Vllaznia)
Sindrit Guri (Vllaznia)
U-21
Armando Vajushi (Vllaznia)
Antonio Marku (Dinamo)
Alis Boci (Luftetari)
Erjon Vucaj (Laçi)
Bekim Bala (Tirana)
Kombëtarja e madhe:
Arsen Sykaj (Vllaznia)
Admir Teli (Baku – Azerbajxhan)
Hamdi Salihi (Rapid Vienë – Austri)
