Ernest Muçi gjeti rrugën e rrjetës për herë të katërt në këtë sezon me fanellën e Legias së Varshavës. Sulmuesi shënoi një gol në fitoren shtëpiake 2-0 të Legias ndaj Wisla Plock.
Sulmuesi nuk e nisi si titullar sfidën teksa u aktivizua në minutën e 62-të, megjithatë gjysmë ore më pas, ish-futbollisti i Tiranës shënoi një gol të cilin e “shpiku” vetë.
Pasi i “rrëmbeu” topin njërit prej mbrojtësve kundërshtarët, 22-vjeçari u lëshua drejt portës dhe me një goditje të fortë mposhti portierin duke siguruar tre pikët.
Por, nëse në kampionat, rruga për tek titulli është thuajse e pamundur, Muçi shpreson ta ndihmojë ekipin e tij në finalen e Kupës që luhet të martën ndaj Rakow. Sulmuesi shprehet se është gati për finalen dhe se ndjehet në formë ndaj shpreson që të marrë sërish një rol si protagonist.
