Superliga rikthehet në këtë fundjavë dhe dueli më ineteresant i javës së 16-të të kampionatit është ai mes Tiranës dhe Vllaznisë.
Klasikja e Shqipërisë e hap vitin 2022 dhe kjo nuk ka ku shkon më bukur. Dy ekipet më të vjetra të vendit dhe që kanë shkruar me germa të arta historinë e futbollit tonë.
Patjetër edhe kësaj rradhe sfida ka një vlerë të veçantë. Kjo pasi përballë do jenë dy skuadra që pretendojnë titullin kampion. Pavarësisht se Tirana është disi e shkëputur ndaj shkodranëve me 8 pikë, ka ende edhe një gjysmë kampionati për t’u luajtur dhe gjithçka mund të ndodhë me fatet e sezonit deri në përfundim të tij.
Duke parë rëndësinë e kësaj sfide sidomos për kuqeblutë e Vllaznisë, tifozët shkodranë si gjithmonë po organizohen për transfertën kryeqytetase. Që në fillim të kësaj jave, mbështetësit kuqeblu kanë filluar përgatitjet për sfidën e fundjavës që do zhvillohet në “Air Albania”.
Tifozët janë ata që nuk i kanë munguar kurrë Vllaznisë në asnjë lloj stadiumi apo qyteti. Edhe kësaj rradhe ata do jenë “arma” plus për ekipin e drejtuar nga Brdariç. Kjo për ti krijuar skuadrës mbështetjen dhe atmosferën e duhur para një transferte kaq të fortë.
Patjetër që përballja me Tiranën është ajo më e ndjera për publikun shkodran dhe të shtunën përveç duelit në fushë, pritet një duel edhe në tribuna.
Endri ÇINARI
